Drejtori i Agjencisë për Parandalimin e Korrupsionit (APK), z. Yll Buleshkaj, përfaqësoi Kosovën në Konferencën Anti-Korrupsion për Ballkanin Perëndimor, e cila u mbajt në Shkup nga 20 deri më 22 nëntor 2024. Ngjarja u organizua nga Ambasada e SHBA-së në Maqedoninë e Veriut dhe Zyra e INL në Shkup.
Gjatë panelit të dytë të konferencës, z. Buleshkaj ndau përvojat dhe arritjet e APK-së në parandalimin e korrupsionit, përmirësimin e masave institucionale dhe promovimin e vetëdijesimit të publikut. Ai theksoi rëndësinë e deklarimit të pasurisë, zbatimit të planeve të integritetit dhe fuqizimit të mekanizmave për mbrojtjen e sinjalizuesve.
Në fjalën e tij, z. Buleshkaj nënvizoi rolin e dixhitalizimit në rritjen e transparencës dhe përmirësimin e mekanizmave për raportimin e parregullsive. Ai vlerësoi bashkëpunimin rajonal dhe ndërkombëtar si element kyç në forcimin e përpjekjeve për luftën kundër korrupsionit.
“Roli ynë kryesor është parandalimi, por gjithashtu mbështesim ndjekjen penale dhe promovojmë ndërgjegjësimin për integritetin. Rezultatet tona tregojnë përkushtimin ndaj një qeverisjeje transparente dhe të përgjegjshme,” theksoi ai.
Pjesëmarrjen e APK-së në këtë konferencë e përkrahu Zyra e INL-së në Kosovë, në kuadër të Ambasadës së SHBA-së në Kosovë.
