Prishtinë, 13 korrik 2026
Agjencia për Parandalimin e Korrupsionit (APK) ka nisur sot aktivitetet në kuadër të shënimit të 20-vjetorit të themelimit, të cilat do të zhvillohen deri më 17 korrik 2026, nën moton “20 Vjet Transparencë dhe Integritet – Duke Rritur Besimin, Duke Parandaluar Korrupsionin”.
Përgjatë dy dekadave të veprimtarisë së saj, Agjencia ka luajtur një rol të rëndësishëm në ndërtimin dhe fuqizimin e mekanizmave për integritet institucional, transparencë, llogaridhënie dhe parandalim të korrupsionit në Republikën e Kosovës. Aktivitetet e kësaj jave shërbejnë njëkohësisht për të reflektuar mbi arritjet e deritanishme dhe për të prezantuar prioritetet dhe zhvillimet më të reja institucionale.
Java e Agjencisë ka nisur me paraqitje publike dhe mediale të Drejtorit të Agjencisë, z. Yll Buleshkaj, i cili ka prezantuar rrugëtimin institucional të APK-së, mandatin e saj, rezultatet e arritura ndër vite, si dhe vizionin për avancimin e mëtejmë të politikave dhe mekanizmave për parandalimin e korrupsionit.
Në kuadër të aktiviteteve të ditës së parë, në ambientet e Agjencisë është inauguruar edhe Galeria Historike e APK-së, e cila përmes fotografive të drejtuesve ndër vite dhe materialeve dokumentuese pasqyron kronologjinë e zhvillimit të institucionit nga themelimi në vitin 2006 e deri më sot. Galeria ruan dhe promovon kujtesën institucionale, duke evidentuar etapat kryesore dhe momentet më të rëndësishme të rrugëtimit të Agjencisë për Parandalimin e Korrupsionit.
Në ditët në vijim, Java e Agjencisë do të vazhdojë me aktivitete informuese në komunat e Republikës së Kosovës, lansimin e platformës Open Data për transparencën e të dhënave të deklarimit të pasurisë, prezantimin e modulit elektronik të trajnimit për konfliktin e interesit dhe etikën, si dhe me Ceremoninë Qendrore të shënimit të 20-vjetorit të themelimit të Agjencisë.
Agjencia për Parandalimin e Korrupsionit mbetet e përkushtuar në forcimin e integritetit institucional, avancimin e transparencës dhe zhvillimin e mekanizmave modernë për parandalimin e korrupsionit, në bashkëpunim të ngushtë me institucionet vendore, partnerët ndërkombëtarë, qytetarët dhe mediat.
