Prishtinë, 17 korrik 2026
Agjencia për Parandalimin e Korrupsionit (APK) përmbylli sot aktivitetet e organizuara në kuadër të shënimit të 20-vjetorit të themelimit, me Ceremoninë Qendrore të “Javës së Agjencisë”, të mbajtur nën moton “20 Vjet Transparencë dhe Integritet – Duke Rritur Besimin, Duke Parandaluar Korrupsionin”.
Në ceremoni morën pjesë përfaqësues të institucioneve vendore, partnerë ndërkombëtarë, përfaqësues të misioneve diplomatike, organizatave të shoqërisë civile dhe institucioneve të drejtësisë, të cilët vlerësuan rolin e Agjencisë në forcimin e integritetit institucional dhe avancimin e mekanizmave për parandalimin e korrupsionit në Republikën e Kosovës.
Në fjalën e tij hyrëse, Drejtori i Agjencisë për Parandalimin e Korrupsionit, z. Yll Buleshkaj tha se historia e Agjencisë është njëkohësisht histori e ndërtimit të kulturës së integritetit institucional në Kosovë.
“Agjencia nuk duhet të jetë vetëm një institucion që administron procedura, por një institucion që ndërton besimin e qytetarëve, parandalon korrupsionin dhe udhëheq me shembull”, theksoi Buleshkaj.
Ai vlerësoi se gjatë dy dekadave të funksionimit Agjencia është shndërruar në një institucion modern, profesional dhe të besueshëm, duke veçuar transformimin digjital, rritjen e transparencës dhe forcimin e mekanizmave për deklarimin e pasurisë, konfliktin e interesit, mbrojtjen e sinjalizuesve dhe vlerësimin e rrezikut nga korrupsioni.
Kryetarja e Kuvendit dhe Ushtruesja e detyrës së Presidentes së Republikës së Kosovës, znj. Albulena Haxhiu, tha se lufta kundër korrupsionit mbetet një angazhim i vazhdueshëm institucional dhe shoqëror, duke theksuar se mbrojtja e interesit publik dhe besimit të qytetarëve kërkon institucione të forta, transparente dhe me integritet.
“20 vjet janë dëshmi e pjekurisë së një institucioni, por kur misioni është mbrojtja e interesit publik, çdo vit është një provë në vete. Sepse korrupsioni nuk pushon kurrë, ai ndryshon formë, kërkon rrugë të reja dhe përpiqet të depërtojë aty ku institucionet dobësohen dhe ku vigjilenca zbehet. Prandaj, lufta kundër korrupsionit nuk është një betejë që fitohet një herë e përgjithmonë, është një përpjekje e vazhdueshme për ta mbrojtur besimin e qytetarëve tek shteti, pra tek Republika jonë”, ka thënë Haxhiu.
Kryetari i Këshillit Prokurorial të Kosovës, z. Arian Gashi vlerësoi bashkëpunimin institucional ndërmjet Këshillit Prokurorial dhe Agjencisë për Parandalimin e Korrupsionit, duke theksuar se forcimi i integritetit dhe sundimit të ligjit kërkon koordinim dhe përgjegjësi të përbashkët të të gjitha institucioneve.
Në emër të Ministrisë së Drejtësisë, zëvendësministri z. Genc Nimoni theksoi se përvjetori i Agjencisë paraqet një mundësi për të riafirmuar përkushtimin institucional në ndërtimin e institucioneve profesionale, transparente dhe llogaridhënëse, si pjesë e reformave për parandalimin dhe luftimin e korrupsionit.
Ndërkaq, Drejtori i Përgjithshëm i Sekretariatit të Iniciativës Rajonale Kundër Korrupsionit (RAI), z. Albert Hani vlerësoi zhvillimin institucional të Agjencisë dhe përkushtimin e saj ndaj bashkëpunimit rajonal, duke veçuar avancimin e digjitalizimit dhe zhvillimin e mekanizmave modernë në funksion të parandalimit të korrupsionit.
Në kuadër të ceremonisë u prezantua edhe projekti audiovizual “20 vjet histori e APK-së”, i cili pasqyron rrugëtimin institucional dhe zhvillimin e Agjencisë që nga themelimi i saj në vitin 2006.
Me këtë rast, Agjencia ndau mirënjohje për individë dhe partnerë që kanë dhënë kontribut të veçantë në mbështetje të zhvillimit institucional dhe avancimit të mekanizmave për parandalimin e korrupsionit. Mirënjohje iu ndanë: Nichola Hoëson, Nuno Queiros, Venera Ramaj, Beate Elsässer, Henrik Riby, Bogusłaë Gertruda, Besim Kelmendi, Bardhyl Dobra, Shaip Havolli dhe Hasan Preteni.
Me Ceremoninë Qendrore u përmbyll “Java e Agjencisë”, e organizuar me rastin e 20-vjetorit të themelimit të Agjencisë për Parandalimin e Korrupsionit. Gjatë pesë ditëve u zhvilluan aktivitete të shumta institucionale, profesionale dhe publike, përfshirë paraqitje mediale, aktivitete me qytetarët, lansimin e platformës Open Data, prezantimin e modulit elektronik të trajnimit për konfliktin e interesit dhe etikën, si dhe panele diskutimi kushtuar transparencës, integritetit dhe qeverisjes së mirë.
Agjencia për Parandalimin e Korrupsionit mbetet e përkushtuar që edhe në vitet në vijim, të avancojë transparencën, integritetin institucional dhe mekanizmat e parandalimit të korrupsionit, në shërbim të interesit publik dhe forcimit të besimit të qytetarëve në institucionet e Republikës së Kosovës.
