Prishtinë, 21 korrik 2026
Agjencia për Parandalimin e Korrupsionit (APK) ka publikuar raportin gjashtëmujor për periudhën 1 janar – 30 qershor 2026, i cili paraqet të dhënat mbi zbatimin e mekanizmave të sinjalizimit në sektorin publik dhe privat, trajtimin e rasteve të sinjalizimit, si dhe aktivitetet e ndërmarra në funksion të mbrojtjes së sinjalizuesve dhe forcimit të integritetit institucional.
Raporti pasqyron progresin në zbatimin e legjislacionit për mbrojtjen e sinjalizuesve dhe dëshmon angazhimin e vazhdueshëm të APK-së për të garantuar trajtim profesional, të paanshëm dhe në përputhje me ligjin për çdo rast të raportuar.
Sinjalizimet e jashtme
Gjatë gjashtëmujorit të parë të vitit 2026, APK ka pranuar 41 raste të sinjalizimit të jashtëm, prej të cilave 40 raste janë trajtuar me profesionalizëm dhe brenda afateve ligjore, ndërsa një rast është bartur për trajtim gjatë muajit korrik.
Nga rastet e trajtuara, 20 raste janë proceduar te institucionet kompetente për veprime të mëtejshme, 14 raste janë refuzuar për shkak të mospërmbushjes së kërkesave ligjore, ndërsa 6 raste janë mbyllur.
Sipas natyrës së rasteve, 22 raste kanë të bëjnë me keqpërdorimin e detyrës zyrtare, 8 raste me procedurat e rekrutimit, 4 raste me procedurat e prokurimit, ndërsa 6 raste i përkasin kategorive të tjera.
Sa i përket strukturës së sinjalizuesve, 27 raste janë raportuar nga qytetarët (19 nga meshkuj dhe 8 nga femra), ndërsa 13 raste janë paraqitur në mënyrë anonime nga operatorë ekonomikë, duke dëshmuar rëndësinë e mekanizmave të sinjalizimit në identifikimin dhe adresimin e rasteve të dyshuara të korrupsionit.
Gjatë kësaj periudhe, 6 sinjalizues kanë kërkuar mbrojtje specifike ligjore, ndërsa APK ka zhvilluar edhe 5 aktivitete ndërgjegjësuese, me pjesëmarrjen e 187 personave, me qëllim të promovimit të mekanizmave të sinjalizimit dhe ngritjes së vetëdijes për rëndësinë e raportimit të parregullsive.
Sinjalizimet e brendshme në institucionet publike
Raporti paraqet edhe të dhënat mbi funksionimin e sistemit të sinjalizimit të brendshëm në institucionet publike.
Gjatë periudhës raportuese, 150 institucione publike kanë raportuar në APK, ndërsa janë evidentuar gjithsej 64 raste të sinjalizimit të brendshëm.
Institucionet me numrin më të madh të rasteve të raportuara janë Korporata Energjetike e Kosovës (KEK) me 14 raste, Shërbimi Korrektues i Kosovës me 12 raste dhe Ndërmarrja Trepça Sh.A. me 10 raste.
Po ashtu, 65 institucione publike kanë njoftuar APK-në për organizimin e aktiviteteve vetëdijësuese lidhur me zbatimin e mekanizmave të sinjalizimit, duke dëshmuar rëndësinë që po i kushtohet forcimit të kulturës së integritetit brenda institucioneve publike.
Sinjalizimet e brendshme në subjektet private
Raporti evidenton edhe progresin e arritur në zbatimin e mekanizmave të sinjalizimit të brendshëm në sektorin privat.
Deri më 9 shkurt 2026, APK ka kontaktuar 683 subjekte private për zbatimin e obligimeve ligjore që rrjedhin nga legjislacioni për sinjalizimin.
Nga këto, 411 subjekte kanë caktuar zyrtarin përgjegjës për pranimin dhe trajtimin e sinjalizimeve, 250 subjekte kanë raportuar për funksionimin e sistemit të sinjalizimit, ndërsa gjatë periudhës raportuese janë evidentuar 18 raste të sinjalizimit të brendshëm.
Këto të dhëna tregojnë se mekanizmat e sinjalizimit po gjejnë zbatim gjithnjë e më të gjerë edhe në sektorin privat, duke kontribuar në rritjen e transparencës, përgjegjshmërisë dhe integritetit organizativ.
Agjencia për Parandalimin e Korrupsionit vlerëson se çdo sinjalizim ka rëndësi dhe mbetet e përkushtuar në garantimin e një sistemi efektiv dhe të besueshëm të sinjalizimit, duke inkurajuar raportimin e dyshimeve për parregullsi, mbrojtjen e sinjalizuesve dhe trajtimin profesional, të paanshëm dhe në përputhje me legjislacionin në fuqi.