Prishtinë, 11 Dhjetor 2025
Në kuadër të Javës së Integritetit 2025 dhe shënimit të Ditës Ndërkombëtare Kundër Korrupsionit, sot u zhvillua sesioni tematik i dedikuar menaxhimit të dhuratave në funksionin zyrtar, fushë e ndjeshme dhe e rëndësishme për integritetin institucional dhe parandalimin e ndikimit të papërshtatshëm në vendimmarrjen publike.
Ky aktivitet, bashkë me të tjerët që janë mbajtur deri tani dhe do të vazhdojnë deri më 12 dhjetor, është organizuar nga Agjencia për Parandalimin e Korrupsionit (APK), në bashkëpunim me Forumin Konsultativ të APK-së me Shoqërinë Civile.
Integriteti në menaxhimin e dhuratave – thelbësor për besimin publik
Në fjalën e tij përshëndetëse, Zv. Drejtori i APK-së, z. Liridon Nika, theksoi rëndësinë e trajtimit të duhur të dhuratave në funksionin zyrtar, duke e konsideruar këtë proces një shtyllë të integritetit institucional.
“Një gjest mirësjelljeje. Një simbol kulturor. Por sapo hyn në hapësirën publike, dhurata nuk është më gjest – bëhet test i integritetit tonë dhe i besimit të qytetarëve.”
Nika nënvizoi se zyrtarët publikë duhet të veprojnë me transparencë dhe profesionalizëm, duke respektuar ligjin dhe standardet ndërkombëtare për të garantuar besueshmëri dhe përgjegjshmëri në ushtrimin e funksionit publik.
Rregullimi dhe raportimi i dhuratave – bazë e mirëqeverisjes
Drejtori i Departamentit për Kontrollin e Pasurisë dhe Dhuratave në APK, z. Afrim Atashi, theksoi se menaxhimi i dhuratave nuk është vetëm çështje ligjore, por edhe një mjet i rëndësishëm i mirëqeverisjes dhe integritetit.
“Një dhuratë mund të përfaqësojë një akt të zakonshëm mirësjelljeje, por në kontekstin zyrtar mund të krijojë konflikte interesi ose perceptim të ndikimit të paligjshëm.”
Atashi shtoi se transparenca dhe zbatimi rigoroz i rregullave janë thelbësore për të ruajtur besimin e publikut dhe për të parandaluar çdo formë ndikimi të papërshtatshëm.
Dhuratat dhe drejtësia – rreziku i padukshëm
Menaxheri i Programeve dhe Hulumtues i Lartë Ligjor në IKD, Gzim Shala, theksoi ndikimin e dhuratave në sistemin e drejtësisë, duke paralajmëruar për pasojat edhe të gjesteve në dukje të vogla.
“Për një gjyqtar, edhe një kafe e paguar nga pala shihet si tendencë për ndërhyrje. Çdo dhuratë është një gur i vogël që rëndon peshoren e padrejtësisë”, tha ai.
Sipas tij, integriteti gjyqësor fillon me refuzimin e çdo dhurate, sepse perceptimi për ndikim cenon besimin e qytetarëve në drejtësi.
Nevoja për mekanizma më të fortë deklarimi
Gazetari hulumtues, Visar Duriqi, theksoi rëndësinë e forcimit të sistemit të deklarimit të dhuratave nga zyrtarët publikë.
“Nëse Kosova dëshiron të luftojë korrupsionin e lartë, duhet të fillojë të kontrollojë dhuratat, favorët dhe udhëtimet e padeklaruara, sepse aty fshihet ndikimi dhe aty fillon tjetërsimi e vendimeve shtetërore”, tha ai, duke sjellë shembuj konkretë nga institucione të ndryshme, me theks sektorin e shëndetësisë.
Mesazhi i tij nënvizoi domosdoshmërinë e ndërtimit të mekanizmave funksionalë të monitorimit dhe transparencës.
Rritje e kontrollit dhe monitorimit nga APK
Diskutimi i sotëm u moderua nga znj. Yllëza Basha, Zyrtare e Lartë për Inspektimin dhe Auditimin e Dhuratave në APK, e cila e orientoi debatin drejt çështjeve praktike të menaxhimit të dhuratave në institucionet publike.
Si përfaqësuese e Agjencisë, ajo theksoi faktin se prej dy vitesh, APK ka intensifikuar kontrollin dhe monitorimin e dhuratave në institucionet publike, sepse transparenca dhe integriteti janë thelbësore për parandalimin e korrupsionit.
“Megjithëse përballemi me vështirësi në raportim, evidencë dhe zbatim të rregullave, angazhimi ynë mbetet i palëkundur për të forcuar llogaridhënien dhe besimin e publikut”, potencoi ajo.
Pajtueshmëri e përgjithshme – më shumë fokus te dhuratat
Pjesëmarrësit e shumtë nga institucione qendrore e lokale si dhe nga shoqëria civile gjatë ditës së sotme u përfshinë aktivisht në diskutim, ndërsa shfaqën pajtueshmëri se integriteti institucional dëmtohet edhe me gjëra të vogla dhe se për këtë arsye kjo temë duhet të trajtohet me më shumë seriozitet, duke shtruar edhe nevojën e informimit më të mirë të zyrtarëve.
Zyrtari Arsim Syla nga ATK theksoi se institucionet dhe OJQ-të duhet të fokusohen në grupe të caktuara për të ndryshuar mentalitetin, si dhe për aftësimin dhe edukimin e zyrtarëve.
Zyrtarja Blerina Morina nga Komuna e Fushë Kosovës ngriti shqetësimin për ngarkesën që kanë zyrtarët kontaktues për menaxhimin e dhuratave, duke kërkuar që të shqyrtohet mundësia e krijimit të pozitave të veçanta dhe rekrutimit të zyrtarëve adekuat.
Ndërsa zyrtari Ekrem Jakupi tha se është e nevojshme që edhe në vendin tonë të veprohet sikurse në disa shtete evropiane, ku deklarimet e dhuratave kryhen brenda afateve dhe ka llogaridhënie. Sipas tij, është e rëndësishme që në ligj të parashihet qartë përgjegjësia brenda afatit.
Aktivitetet e Javës së Integritetit 2025 do të vazhdojnë me sesione të tjera tematike gjatë ditëve në vijim, duke synuar forcimin e integritetit dhe kulturës së llogaridhënies në të gjitha nivelet e administratës publike.
