Prishtinë, 4 shtator 2025
Me iniciativën e Agjencisë për Parandalimin e Korrupsionit (APK) sot u mbajt takimi i parë me përfaqësues të organizatave të shoqërisë civile, i cili shënoi fillimin e procesit për themelimin e Forumit Konsultativ të APK-së me Shoqërinë Civile.
Ky takim përbën një hap të rëndësishëm në avancimin e bashkëpunimit dhe koordinimit të përpjekjeve të përbashkëta në luftën kundër korrupsionit në Kosovë.
Në fjalën e tij, drejtori i APK-së, z. Yll Buleshkaj, prezantoi koncept-propozimin për themelimin e Forumit dhe theksoi rëndësinë e partneritetit të ngushtë ndërmjet institucionit dhe shoqërisë civile, si bazë për forcimin e integritetit, transparencës dhe llogaridhënies në vend.
Pjesëmarrësit shprehën mbështetjen e tyre për këtë nismë, duke u dakorduar që koncepti të plotësohet në ditët në vijim dhe të vijohen procedurat për formalizimin e Forumit. Ndërsa është lënë e hapur mundësia që të bashkohen edhe OJQ dhe institucione tjera publike, si dhe donatorë e përfaqësi diplomatike.
Gjatë diskutimeve u trajtua edhe roli i Forumit si mekanizëm këshillëdhënës dhe platformë bashkëpunimi, që do të lehtësojë dialogun e rregullt ndërmjet APK-së dhe shoqërisë civile, si dhe do të fuqizojë kontributin e saj në proceset vendimmarrëse të Agjencisë.
Në kuadër të këtij bashkëpunimi u paralajmërua edhe organizimi një jave me aktiviteteve të shumta për të shënuar Ditën Ndërkombëtare Kundër Korrupsionit, që mbahet në muajin dhjetor në kuadër të “Javës së Integritetit 2025” – një seri tryezash tematike që synojnë rritjen e efektivitetit në parandalimin e korrupsionit në institucionet publike dhe sektorin privat.
Agjencia dhe organizatat e shoqërisë civile konfirmuan angazhimin e tyre për të punuar së bashku në ndërtimin e një mjedisi më transparent dhe llogaridhënës në Republikën e Kosovës.
Takimet e Forumit do të mbahen rregullisht, me qëllim të konsolidimit të një bashkëpunimi të qëndrueshëm dhe efektiv, në shërbim të një Kosove më të drejtë dhe me integritet të fortë.
