Prishtinë, 4-5 Dhjetor 2025
Agjencia për Parandalimin e Korrupsionit (APK), në bashkëpunim me Instrumentin e Ndihmës Teknike të Komisionit Evropian – TAIEX, organizoi një punëtori dyditore kushtuar mekanizmave të raportimit dhe standardeve të Bashkimit Evropian në fushën e integritetit publik.
Punëtoria, me pjesëmarrjen e stafit profesional të APK-së, adresoi temat thelbësore që lidhen me deklarimin dhe verifikimin e pasurisë, dhuratat dhe mbrojtjen e sinjalizuesve. Ekspertë nga shtetet anëtare të BE-së prezantuan praktikat dhe qasjet më të avancuara evropiane për rritjen e transparencës dhe llogaridhënies institucionale.
Në fjalën e tij, Drejtori i APK-së, z. Yll Buleshkaj, theksoi rëndësinë e ngritjes së kapaciteteve profesionale dhe harmonizimit të proceseve të Agjencisë me standardet e BE-së. Ai dha shembuj të shumtë e konkretë të zgjidhjes së rasteve nga APK-ja në Republikën e Kosovës.
Ndërsa përfaqësuesja e Zyrës së BE-së në Kosovë, znj. Fotini Antonopoulou, vlerësoi bashkëpunimin e vazhdueshëm dhe përkushtimin institucional në avancimin e integritetit publik.
Ligjëratën kryesore e mbajti z. Silviu Popa, ekspert nga Rumania, i cili ndau përvoja praktike mbi modelet e BE-së për përmirësimin e sistemeve të deklarimit dhe verifikimit të pasurisë, si edhe qasjet më efikase për adresimin e rasteve të dhuratave.
Në temën e sinjalizimit dhe rolit të tij në parandalimin e korrupsionit, kontribut të rëndësishëm në ditën e dytë të punëtorisë dha znj. Monika Kalinauskiene nga Lituania, e cila theksoi rëndësinë e mbrojtjes së plotë dhe efektive të sinjalizuesve, ndërsa përmendi raste të ndryshme të sinjalizimeve nëpër vende të ndryshme të BE-së.
Punëtorisë iu bashkuan online edhe ekspertët nga Irlanda, znj. Catheryne McCarthy dhe z. Niall Colbert, të cilët prezantuan praktika të vlefshme mbi mekanizmat modernë të raportimit dhe mbrojtjes së sinjalizuesve në nivel evropian.
Gjatë dy ditëve, pjesëmarrësit diskutuan raste konkrete dhe zgjidhje praktike të përdorura në vendet e BE-së, të cilat do të kontribuojnë në forcimin e mëtejshëm të kapaciteteve profesionale dhe mekanizmave të Agjencisë.
Agjencia për Parandalimin e Korrupsionit vlerëson se aktivitetet e këtij lloji ndikojnë në përforcimin e integritetit publik dhe forcimin e rolit të saj si institucion kyç në parandalimin e korrupsionit në Kosovë. APK mbetet e përkushtuar të avancojë drejt standardeve të Bashkimit Evropian dhe të thellojë bashkëpunimin me partnerët ndërkombëtarë.
