Prishtinë, 8 dhjetor 2025
Agjencia për Parandalimin e Korrupsionit (APK), në bashkëpunim me Forumin Konsultativ të APK-së me Shoqërinë Civile, ka hapur sot aktivitetet e Javës së Integritetit 2025 me panelin e parë tematik, të fokusuar në rëndësinë dhe ndikimin e planeve të integritetit në institucionet publike të Republikës së Kosovës.
Në hapje të ngjarjes, Drejtori i APK-së, z. Yll Buleshkaj foli për rëndësinë e forcimit të mekanizmave proaktivë për parandalimin e korrupsionit dhe rritjen e kulturës së përgjegjësisë institucionale.
Ai nënvizoi se Java e Integritetit është tashmë një platformë e rëndësishme vjetore, që synon të ndërgjegjësojë opinionin publik dhe të thellojë bashkëpunimin ndërinstitucional në luftën kundër korrupsionit, në kuadër të shënimit të Ditës Ndërkombëtare Kundër Korrupsionit – 9 Dhjetor.
“Në Kosovë, integriteti i zyrtarëve dhe institucioneve nuk është më opsional – është detyrim ligjor dhe standard profesional”, theksoi Drejtori Buleshkaj në hapjen e Javës së Integritetit 2025.
Paneli i sotëm, me temë “Kontributi i Planeve të Integritetit në Parandalimin e Korrupsionit”, mblodhi përfaqësues institucionalë, akademikë dhe ekspertë të shoqërisë civile, duke ofruar një pasqyrë gjithëpërfshirëse mbi zbatimin, sfidat dhe mundësitë e avancimit të këtyre planeve në sektorin publik.
Fjalimet hyrëse në panel u mbajtën nga: Burim Sadiku, Udhëheqës i Divizionit për Integritet dhe Strategji – APK; Bekim Baliqi, Profesor Universitar – UP; Albert Avdiu, Konsulent i Jashtëm – Lëvizja FOL; Albana Rexha, Analiste e Lartë e Politikave – Demokraci Plus (D+), kurse moderimin e bëri Marigona Gashi, Udhëheqës i Divizionit për Shërbime të Përgjithshme – APK.
Në deklaratën e tij, z. Burim Sadiku theksoi se planet e integritetit mbeten mekanizma kyç për identifikimin e hershëm të rreziqeve dhe forcimin e kontrollit të brendshëm në institucione.
Sipas tij, aty ku këto plane zbatohen me seriozitet, “rritet transparenca, zvogëlohen hapësirat për abuzim dhe forcohet kultura institucionale e llogaridhënies”.
Ai shtoi se standardizimi, digjitalizimi dhe përfshirja më e madhe e drejtuesve institucionalë janë domosdoshmëri për rritjen e efektivitetit të planeve në gjithë sektorin publik.
Panelisti tjetër, Prof. Bekim Baliq, theksoi se qëllimi i Planit të Integritetit, metodologjia e hartimit dhe baza ligjore janë të duhura dhe shumë të rëndësishme për të promovuar llogaridhënien dhe transparencën.
“Mendoj se këto dokumente, ashtu si edhe shumë strategji dhe rregullore të tjera në vend, janë shndërruar më shumë në dokumente formale për raportim (në qeveri apo në BE), sesa në mjete reale që ndryshojnë sjelljen institucionale. Kjo ndodh si pasojë e mungesës së implementimit të plotë, monitorimit të dobët ose joefektiv, si dhe ndikimit politik mbi autoritetet mbikëqyrëse. Po ashtu, vërej se në këtë drejtim ka mungesë të burimeve, si njerëzore ashtu edhe financiare”.
Albert Avdiu tha se duhet angazhim që Planet e Integritetit të harmonizohen me vlerësimet tjera që bëhen për parandalimin e keqpërdorimeve, siç është lista e rreziqeve në aspektin financiar.
Kurse Albana Rexha tha se që plani i integritetit të sjellë ndryshim të vërtetë, ai duhet të përmbushë katër kritere kyçe, duke përfshirë pranueshmërinë nga institucioni, përfshirjen e stafit në hartim, monitorimin me indikatorë të matshëm dhe rishikimin e rregullt.
Diskutimi u moderua nga znj. Marigona Gashi, e cila orientoi pjesëmarrësit drejt trajtimit të çështjeve konkrete si: boshllëqet e evidentuara gjatë hartimit të planeve, funksionalizimi i monitorimit, rreziqet më të larta të korrupsionit në sektorin publik dhe roli i indikatorëve të matshëm në avancimin e integritetit institucional.
Pjesëmarrësit u pajtuan se planet e integritetit duhet të shndërrohen në mekanizma të gjallë pune, të lidhur drejtpërdrejt me vendimmarrjen dhe performancën e institucioneve.
Përfaqësues të shoqërisë civile theksuan rëndësinë e monitorimit të pavarur për të siguruar llogaridhënie, ndërsa përfaqësuesit institucionalë kërkuan më shumë bashkëpunim në ndërtimin e kapaciteteve dhe në digjitalizimin e proceseve.
Aktivitetet e Javës së Integritetit 2025 do të vazhdojnë gjatë ditëve në vijim me sesione të tjera tematike, të cilat synojnë të forcojnë kulturën e integritetit dhe të promovojnë parandalimin e korrupsionit në të gjitha nivelet e administratës publike.
