Agjencia për Parandalimin e Korrupsionit (APK), gjatë këtij viti, ka nisur procesin e vetëvlerësimit të performancës kundër korrupsionit, në përputhje me Ligjin nr. 08/L-017 për Agjencinë për Parandalimin e Korrupsionit, përkatësisht nenin 26 që rregullon vlerësimin e rrezikut nga korrupsioni.
Ky proces zhvillohet në përputhje me Udhëzuesin e Rrjetit Kundër Korrupsion të Organizatës për Bashkëpunim Ekonomik dhe Zhvillim (OECD) për Evropën Lindore dhe Azinë Qendrore, në kuadër të Planit të Veprimit kundër Korrupsionit të Stambollit (Istanbul Anti-Corruption Action Plan), Raundi i Pestë i Monitorimit.
Për realizimin e këtij vlerësimi, APK ka siguruar bashkëpunimin e institucioneve relevante përmes mbledhjes së të dhënave, plotësimit të pyetësorëve dhe ofrimit të dëshmive mbështetëse. Qëllimi i procesit është të sigurojë një matje objektive të nivelit të zbatimit praktik të masave kundër korrupsionit në Republikën e Kosovës, në raport me standardet ndërkombëtare dhe praktikat më të mira.
Ky vlerësim synon të kontribuojë në forcimin e vendimmarrjes së bazuar në evidencë, rritjen e transparencës institucionale, përmirësimin e qëndrueshmërisë së politikave kundër korrupsionit, si dhe identifikimin e fushave me rrezik të shtuar për korrupsion.
Duke e konsideruar pjesëmarrjen ndërinstitucionale si element kyç për suksesin e këtij procesi, APK që nga fazat e hershme ka zhvilluar tryeza diskutimi, takime koordinuese dhe komunikim të vazhdueshëm me institucionet kryesore të vendit. Në këtë proces janë përfshirë, ndër të tjera: Kuvendi i Republikës së Kosovës, Gjykata Kushtetuese, Këshilli Gjyqësor i Kosovës, Këshilli Prokurorial i Kosovës, Gjykatat Themelore dhe degët e tyre, Zyra e Kryeministrit, Ministria e Drejtësisë, Ministria e Punëve të Jashtme dhe Diasporës, Zyra Kombëtare e Auditimit, Policia e Kosovës, Dogana e Kosovës, Shërbimi Korrektues i Kosovës, Shërbimi Sprovues i Kosovës, si dhe institucione të tjera relevante.
Procesi i vetëvlerësimit zhvillohet në kuadër të mandatit ligjor të APK-së, përkatësisht nga Departamenti për Vlerësim, Monitorim dhe Analiza, i cili përfshin Divizionin për Integritet dhe Strategji dhe Divizionin për Analiza dhe Vlerësim Kundër Korrupsionit.
Në këtë kuadër, Divizioni për Analiza dhe Vlerësim Kundër Korrupsionit është përgjegjës për kryerjen e vlerësimeve kombëtare dhe sektoriale të rrezikut nga korrupsioni, vlerësimin kundër korrupsion të akteve ligjore, dhënien e rekomandimeve dhe opinioneve për institucionet shtetërore, si dhe përgatitjen, publikimin dhe shpërndarjen e raporteve përkatëse, në përputhje me legjislacionin në fuqi.
Agjencia për Parandalimin e Korrupsionit mbetet e përkushtuar që, përmes këtij procesi të vetëvlerësimit dhe bashkëpunimit të ngushtë ndërinstitucional, të kontribuojë në avancimin e standardeve kundër korrupsionit, forcimin e integritetit institucional dhe sundimin e ligjit në Republikën e Kosovës.
