Agjencia për Parandalimin e Korrupsionit (APK) zhvilloi sot një sesion informues në Universitetin e Prishtinës me temën: “Konflikti i interesit dhe papajtueshmëritë në ushtrimin e funksionit publik”.
Në këtë aktivitet morën pjesë Rektori i Universitetit, Prof. Arben Hajrullahu, dekanë të fakulteteve, sekretarë dhe zyrtarë të tjerë përgjegjës, me qëllim të informimit dhe shkëmbimit të pikëpamjeve mbi zbatimin e legjislacionit për parandalimin e konfliktit të interesit në institucionet publike.
Nga ana e APK-së, prezantime dhe sqarime lidhur me kuadrin ligjor dhe praktikat e trajtimit të rasteve ofruan: z. Esad Ejupi – Drejtor i Departamentit për Parandalimin e Konfliktit të Interesit, z. Driton Shala – Shef i Divizionit për Këshillim dhe Raportim, si dhe z. Frasher Murtezaj – Shef i Divizionit për Zgjidhjen e Konfliktit të Interesit.
Gjatë sesionit u diskutuan situata konkrete që mund të paraqiten në ushtrimin e funksionit publik, mënyrat e identifikimit të konfliktit të interesit dhe papajtueshmërive, si dhe përgjegjësitë ligjore të zyrtarëve publikë.
Pjesëmarrësit adresuan pyetje praktike lidhur me rastet me të cilat përballen dhe procedurat përkatëse që duhet ndjekur.
Ky sesion është pjesë e aktiviteteve të vazhdueshme informuese dhe këshilluese që APK zhvillon me institucione publike, në funksion të forcimit të integritetit institucional dhe zbatimit të drejtë të legjislacionit në fuqi.
Me këtë rast, Rektori i Universitetit, z. Arben Hajrullahu shfaqi kërkesën që APK të vazhdojë sesionet edhe në nivel të fakulteteve, në funksion të rritjes së ndërgjegjësimit dhe përgjegjësisë institucionale për parandalimin e konfliktit të interesit.
Agjencia për Parandalimin e Korrupsionit mbetet e përkushtuar për bashkëpunim institucional dhe përmbushjen e mandatit të saj ligjor në mbrojtje të interesit publik.
