1920 zyrtarë kanë deklaruar pasurinë – APK u bën thirrje edhe 8420 subjekteve deklaruese ta kryejnë obligimin deri më 31 mars
Agjencia për Parandalimin e Korrupsionit rikujton opinionin publik dhe të gjitha subjektet deklaruese se është duke vijuar procesi i deklarimit të rregullt vjetor të pasurisë për vitin kalendarik 2025 (1 janar – 31 dhjetor 2025), i cili ka filluar më 1 mars 2026 dhe përfundon më 31 mars 2026.
Në përputhje me Ligjin për Deklarimin, Prejardhjen dhe Kontrollin e Pasurisë dhe Dhuratave, të gjithë personat zyrtarë në Republikën e Kosovës që i nënshtrohen këtij obligimi ligjor janë të obliguar ta kryejnë deklarimin e pasurisë brenda afatit të përcaktuar me legjislacionin në fuqi.
Deri më tani, pas dy javësh nga fillimi i procesit të deklarimit, obligimit ligjor i janë përgjigjur 18.5 %, përkatësisht 1920 zyrtarë publikë. Ndërkaq, numri i përgjithshëm i subjekteve deklaruese që i nënshtrohen deklarimit të rregullt vjetor të pasurisë për këtë cikël është 10340 zyrtarë të lartë publikë.
Agjencia për Parandalimin e Korrupsionit (APK) u bën thirrje edhe 8420 subjekteve deklaruese që ende nuk e kanë kryer deklarimin, që ta përmbushin këtë obligim ligjor brenda afatit të përcaktuar, deri më 31 mars 2026, duke dëshmuar përgjegjësi institucionale, transparencë dhe respekt për publikun.
Muaji mars shënon periudhën e deklarimit të rregullt të pasurisë, një proces i rëndësishëm që kontribuon në forcimin e integritetit institucional, transparencës dhe llogaridhënies ndaj qytetarëve të Republikës së Kosovës.
“Deklarimi në kohë i pasurisë forcon kulturën e integritetit në institucionet tona dhe njëkohësisht kontribuon në shmangien e pasojave dhe sanksioneve të parapara në rast të mosrespektimit të obligimit ligjor”, theksoi Drejtori i Agjencisë për Parandalimin e Korrupsionit, z. Yll Buleshkaj.
Mosdeklarimi brenda afatit, vonesa në deklarim apo deklarimi i pasaktë përbëjnë shkelje të obligimeve ligjore dhe sanksionohen sipas legjislacionit në fuqi. Varësisht nga natyra e shkeljes, sanksionet përfshijnë gjoba deri në 500 euro, paraqitjen e kallëzimit penal dhe referimin e çështjes në organet e drejtësisë, ndërsa gjykata mund të shqiptojë edhe dënim me burgim deri në pesë (5) vjet. Po ashtu, pasuria e padeklaruar mund t’i nënshtrohet konfiskimit në përputhje me ligjin.
Subjektet deklaruese që kanë këtë obligim ligjor duhet të qasen në sistemin elektronik të deklarimit të pasurisë, të zhvilluar nga Agjencia për Parandalimin e Korrupsionit, përmes vegëzës: 
https://e-deklarimi.rks-gov.net/
Me qëllim të lehtësimit të procesit të deklarimit, Agjencia ka përgatitur edhe Manualin për kyçje në sistemin DMSA dhe për resetimin e fjalëkalimit, i cili përmban udhëzime të detajuara për qasje në platformën elektronike dhe për procedurat e rikthimit të fjalëkalimit në rast të harrimit të tij.
Për informata më të detajuara lidhur me procesin e deklarimit të pasurisë, manualin për përdorimin e sistemit dhe listën e subjekteve deklaruese, ju lutemi vizitoni ueb-faqen zyrtare të Agjencisë për Parandalimin e Korrupsionit: https://apk-rks.net/