MANUALI PËR KYÇJE NË SISTEMIN DMSA DHE RESETIM TË FJALËKALIMIT
Agjencia për Parandalimin e Korrupsionit njofton opinionin publik dhe të gjitha subjektet deklaruese se procesi i deklarimit të rregullt vjetor të pasurisë për vitin kalendarik 2025 (1 janar – 31 dhjetor 2025) ka filluar më 1 mars 2026 dhe përfundon më 31 mars 2026.
Muaji mars shënon periudhën e deklarimit të rregullt të pasurisë – një muaj që reflekton transparencë, integritet dhe llogaridhënie ndaj qytetarëve të Republikës së Kosovës.
Në përputhje me Ligjin për Deklarimin, Prejardhjen dhe Kontrollin e Pasurisë dhe Dhuratave, të gjithë personat zyrtarë në Republikën e Kosovës që i nënshtrohen këtij obligimi ligjor, obligohen ta kryejnë deklarimin e pasurisë brenda afatit të përcaktuar me legjislacionin në fuqi.
Drejtori i Agjencisë për Parandalimin e Korrupsionit, z. Yll Buleshkaj, u bën thirrje të gjitha subjekteve deklaruese që ta përmbushin këtë obligim brenda afatit, deri më 31 mars 2026, duke dëshmuar përgjegjësi institucionale dhe respekt për publikun.
“Deklarimi në kohë forcon kulturën e integritetit në institucionet tona dhe kontribuon në shmangien e pasojave dhe sanksioneve të parapara në rast të mosrespektimit të obligimit ligjor”, theksoi Drejtori Buleshkaj.
Me qëllim të lehtësimit të procesit të deklarimit, Agjencia ka përgatitur Manualin për kyçje në sistemin DMSA dhe resetim të fjalëkalimit, i cili ofron udhëzime të detajuara për qasje në platformën elektronike të deklarimit, si dhe për procedurat e rikthimit të fjalëkalimit në rast të harrimit të tij.
Manuali është në dispozicion më poshtë dhe shërben si udhëzues praktik për të gjitha subjektet deklaruese, në mënyrë që procesi i deklarimit të zhvillohet në mënyrë të rregullt, të saktë dhe brenda afatit të përcaktuar.