Prishtinë, 23 mars 2026
Agjencia për Parandalimin e Korrupsionit njofton se procesi i deklarimit të rregullt vjetor të pasurisë për vitin kalendarik 2025 (1 janar – 31 dhjetor 2025) është duke vijuar me intensitet nga dita e hapjes, ndërsa afati ligjor për përmbylljen e këtij procesi mbetet 31 mars 2026.
Deri në këtë fazë të procesit, janë 2876 subjekte deklaruese që e kanë përfunduar deklarimin e rregullt vjetor të pasurisë, ndërsa një numër i konsiderueshëm i tyre janë në proces të plotësimit të formularit elektronik. Sipas të dhënave aktuale, janë 1964 zyrtarë që kanë nisur deklarimin dhe janë ende në proces, ndërsa pjesa tjetër subjekte deklaruese nuk e kanë filluar ende përmbushjen e këtij obligimi ligjor.
Nga përditësimet e fundit të bëra sot në sistem, numri i përgjithshëm i subjekteve deklaruese që i nënshtrohen këtij obligimi në Republikën e Kosovës për këtë cikël është 10353 zyrtarë të lartë publikë.
Në përputhje me Ligjin për Deklarimin, Prejardhjen dhe Kontrollin e Pasurisë dhe Dhuratave, të gjithë personat zyrtarë që i nënshtrohen këtij obligimi janë të detyruar ta kryejnë deklarimin brenda afatit të përcaktuar me ligj.
Agjencia për Parandalimin e Korrupsionit u bën sërish thirrje të gjithë zyrtarëve që ende nuk e kanë përfunduar deklarimin, që ta kryejnë këtë obligim sa më parë, brenda afatit ligjor, duke kontribuar në forcimin e transparencës dhe integritetit institucional.
“Deklarimi i pasurisë brenda afatit ligjor është një element kyç për ndërtimin e besimit publik dhe për forcimin e kulturës së integritetit në institucionet e Republikës së Kosovës”, theksoi Drejtori i Agjencisë për Parandalimin e Korrupsionit, z. Yll Buleshkaj.
Agjencia rikujton se mosdeklarimi brenda afatit, vonesa apo deklarimi i pasaktë përbëjnë shkelje të obligimeve ligjore dhe sanksionohen sipas legjislacionit në fuqi. Sanksionet përfshijnë gjoba, kallëzim penal dhe masa të tjera ligjore, ndërsa në raste të caktuara mund të shqiptohen edhe dënime me burgim dhe konfiskim të pasurisë së padeklaruar.
Subjektet deklaruese duhet të qasen në sistemin elektronik të deklarimit të pasurisë, të zhvilluar nga Agjencia për Parandalimin e Korrupsionit, përmes vegëzës: https://e-deklarimi.rks-gov.net/
Për të lehtësuar procesin, Agjencia ka vënë në dispozicion edhe Manualin për përdorimin e sistemit dhe procedurat për rikthimin e fjalëkalimit, ndërsa për informata shtesë, subjektet deklaruese mund të vizitojnë ueb-faqen zyrtare: https://apk-rks.net/