Prishtinë, 12 gusht 2025
Agjencia për Parandalimin e Korrupsionit (APK) hapi dyert dhe mirëpriti sot një grup të rinjsh nga e gjithë Kosova, në kuadër të një vizite informuese që përfshiu një bashkëbisedim të hapur me Drejtorin e Agjencisë, z. Yll Buleshkaj.
Gjatë takimit, Drejtori Buleshkaj prezantoi mandatin dhe funksionet e APK-së, si dhe sfidat që has institucioni në luftën kundër korrupsionit.
Ai sqaroi punën që bëhet për kontrollin e pasurisë së zyrtarëve publikë, parandalimin e konfliktit të interesit dhe mbrojtjen e sinjalizuesve.
Drejtori Buleshkaj theksoi përkushtimin e APK-së për të forcuar edukimin qytetar dhe për të ndërtuar ura komunikimi me të rinjtë, si bartës të ndryshimit dhe garanci për një të ardhme më të ndershme dhe transparente.
“Ne duhet të punojmë së bashku me rininë dhe të angazhohemi për institucione që veprojnë me ndershmëri dhe përgjegjësi. Roli juaj si gjeneratë e re është i pazëvendësueshëm,” u shpreh Buleshkaj.
Vizita u zhvillua në kuadër të aktiviteteve për shënimin e Ditës Ndërkombëtare të Rinisë, me synim njohjen e drejtpërdrejtë të të rinjve me punën e Agjencisë dhe promovimin e kulturës së integritetit në shoqëri.
Të rinjtë pjesëmarrësit shfaqën interes të madh për temat e trajtuara, duke ngritur pyetje rreth transparencës, integritetit dhe mënyrave konkrete se si ata vetë mund të kontribuojnë në parandalimin e korrupsionit.
Në këtë aktivitet morën pjesë të rinj që kanë qenë pjesë e Akademisë Kundër Korrupsionit, të organizuar nga Instituti Demokratik i Kosovës (KDI) me mbështetjen e Ambasadës Suedeze në Kosovë.
Në takim ishin të pranishëm edhe zëvendësambasadori i Suedisë, z. Henrik Riby, dhe drejtori ekzekutiv i KDI-së, z. Ismet Kryeziu, me bashkëpunëtorë.
