Prishtinë, 14 korrik 2026
Në kuadër të aktiviteteve për shënimin e 20-vjetorit të themelimit, Agjencia për Parandalimin e Korrupsionit (APK) e ka vazhduar sot “Javën e Agjencisë” me aktivitete pranë qytetarëve, duke zhvilluar fushatë informuese dhe edukuese në 11 komuna të Republikës së Kosovës.
Zyrtarët e Agjencisë realizuan takime dhe bashkëbisedime të drejtpërdrejta me qytetarët, shpërndanë materiale informuese mbi mandatin dhe kompetencat e APK-së, si dhe prezantuan mekanizmat institucionalë për parandalimin e korrupsionit dhe mënyrat e raportimit të rasteve të dyshuara të korrupsionit.
Aktivitetet u zhvilluan në komunat: Prishtinë, Prizren, Pejë, Klinë, Mitrovicë e Jugut, Mitrovicë e Veriut, Gjilan, Ferizaj, Gjakovë, Graçanicë dhe Novobërdë, duke përfshirë komunitete të ndryshme në funksion të informimit dhe komunikimit të drejtpërdrejtë me qytetarët.
Qëllimi i kësaj nisme është forcimi i lidhjes ndërmjet institucionit dhe qytetarëve, rritja e ndërgjegjësimit për rëndësinë e integritetit dhe transparencës në sektorin publik, si dhe inkurajimi i qytetarëve që të shfrytëzojnë mekanizmat ligjorë në dispozicion për raportimin e korrupsionit dhe mbrojtjen e interesit publik.
Përmes kësaj qasjeje, Agjencia riafirmon se parandalimi i korrupsionit nuk mbështetet vetëm në mekanizmat institucionalë, por edhe në një partneritet të qëndrueshëm me qytetarët, të bazuar në besim, informim dhe komunikim të hapur.
Aktiviteti “APK pranë qytetarëve” është pjesë e programit të “Javës së Agjencisë”, e cila po organizohet nga 13 deri më 17 korrik 2026, nën moton “20 Vjet Transparencë dhe Integritet – Duke Rritur Besimin, Duke Parandaluar Korrupsionin”.
Agjencia për Parandalimin e Korrupsionit mbetet e përkushtuar që, krahas forcimit të mekanizmave institucionalë, të vazhdojë të investojë në informimin, edukimin dhe ndërgjegjësimin e qytetarëve, si elemente thelbësore për ndërtimin e një administrate publike transparente, me integritet dhe llogaridhënëse.
