Agjencia për Parandalimin e Korrupsionit ka vazhduar edhe sot ciklin e trajnimeve për një grup zyrtarësh kontaktues të disa institucioneve publike të Kosovës, me fokus në deklarimin e pasurisë dhe dhuratave dhe synim forcimin e kapaciteteve profesionale dhe zbatimin e njëtrajtshëm të legjislacionit në fuqi.
Trajnimi u organizua për zyrtarët kontaktues të institucioneve të ndryshme të Kosovës, të cilët janë caktuar gjatë vitit 2026 dhe nuk kishin ndjekur më parë trajnim për përdorimin e sistemit elektronik të deklarimit të pasurisë dhe dhuratave.
Gjatë trajnimit u prezantua në mënyrë praktike funksionimi i sistemit elektronik DMSA për deklarimin e pasurisë, i zhvilluar nga Agjencia dhe i funksionalizuar në fillim të vitit 2026. Pjesëmarrësit u njohën me funksionalitetet kryesore të sistemit, mënyrën e përdorimit të modulit për regjistrimin dhe raportimin e dhuratave, si dhe me procedurat që duhet të ndiqen gjatë ushtrimit të detyrave të tyre.
Përveç aspektit teknik, zyrtarëve kontaktues iu prezantuan edhe përgjegjësitë dhe obligimet që burojnë nga legjislacioni në fuqi për deklarimin e pasurisë dhe dhuratave.
Në të njëjtën kohë, u ofruan sqarime për çështje praktike dhe u konfirmua gatishmëria e Agjencisë për të ofruar mbështetje të vazhdueshme në adresimin e sfidave apo paqartësive që mund të paraqiten gjatë kryerjes së detyrës.
Trajnimi u realizua nga zyrtarët e teknologjisë informative të Agjencisë, me pjesëmarrjen e Udhëheqësit të Divizionit për Deklarimin e Pasurisë dhe Shqiptimin e Gjobave, Udhëheqësit të Divizionit për Dhurata, si dhe zyrtarëve të këtyre divizioneve.
Agjencia për Parandalimin e Korrupsionit do të vazhdojë organizimin e aktiviteteve të tilla trajnuese, me qëllim mbështetjen e institucioneve publike në zbatimin korrekt dhe efektiv të obligimeve ligjore, si dhe forcimin e integritetit dhe transparencës në administratën publike.
