Prishtinë, 15 korrik 2026
Në kuadër të aktiviteteve për shënimin e 20-vjetorit të themelimit, Agjencia për Parandalimin e Korrupsionit (APK) organizoi sot konferencën me temën “Transparenca e të Dhënave – Themeli i Demokracisë dhe Vlerësimeve të Pavarura”, gjatë së cilës u lansua platforma Open Data e Agjencisë.
Në hapje të aktivitetit, Drejtori i Agjencisë për Parandalimin e Korrupsionit, z. Yll Buleshkaj, theksoi se avancimi i transparencës dhe qasja e publikut në të dhënat me interes publik përbëjnë një nga shtyllat kryesore të forcimit të integritetit institucional dhe rritjes së besimit të qytetarëve ndaj institucioneve publike.
Gjatë aktivitetit, Drejtori Buleshkaj, tha se në dy dekadat e funksionimit institucioni ka kaluar përmes sfidave, por ka shënuar edhe arritje të rëndësishme.
“Në këto 20 vjet agjencia ka numëruar, përveç sfidave që ka pasur që nga dita e parë, edhe suksese të shumta. Sukseset fillojnë që nga krijimi i strukturës së agjencisë, rekrutimi i stafit adekuat dhe trajnimi i tyre, po ashtu edhe krijimi i legjislacionit bazë për funksionimin dhe procedurave të funksionimit”, tha ai.
Drejtori Buleshkaj vlerësoi se lansimi i platformës Open Data përfaqëson një hap të rëndësishëm drejt rritjes së transparencës institucionale dhe lehtësimit të qasjes në të dhëna, duke krijuar mundësi më të mëdha për analizë, hulumtim dhe monitorim nga publiku, mediat, shoqëria civile dhe komuniteti akademik.
Platforma Open Data e APK-së ofron qasje më të lehtë në regjistra dhe të dhëna që lidhen me ushtrimin e mandatit të Agjencisë, duke kontribuar në forcimin e llogaridhënies dhe promovimin e qeverisjes së hapur.
Udhëheqësi i Divizionit për E-Shërbime dhe Sisteme në APK, z. Besnik Dragusha, bëri prezantimin e detajuar të funksionimit praktik të platformës, duke treguar mënyrën se si mund të shfqytëzohet ajo.
“Platforma Open Data është zhvilluar me teknologjinë më të fundit të Microsoft-it, .NET Core me .NET Core dhe ka një bazë të integruar e cila gjithashtu është teknologji e Microsoft-it, SQL Server…”, tha mes tjerash Dragusha.
Pas ceremonisë së lansimit u zhvillua paneli i diskutimit me temën “Transparenca e të Dhënave – Themeli i Demokracisë dhe Vlerësimeve të Pavarura”, ku u diskutua mbi rëndësinë e të dhënave të hapura në rritjen e transparencës, fuqizimin e llogaridhënies publike dhe përmirësimin e politikëbërjes së bazuar në evidencë.
Në panel morën pjesë Mimoza Karameta nga OGP Kosova, Diana Metushi Krasniqi nga KDI/Transparency International Kosova, Visar Rushiti nga Democracy Plus dhe Milot Shala nga Agjencia për Parandalimin e Korrupsionit, të cilët ndanë perspektivat e tyre mbi zhvillimin e politikave të transparencës dhe rëndësinë e bashkëpunimit ndërinstitucional në avancimin e qeverisjes së hapur.
Ky aktivitet u organizua në kuadër të “Javës së Agjencisë për Parandalimin e Korrupsionit”, e cila po zhvillohet me rastin e 20-vjetorit të themelimit të Agjencisë, nën moton “20 Vjet Transparencë dhe Integritet – Duke Rritur Besimin, Duke Parandaluar Korrupsionin”.
Agjencia për Parandalimin e Korrupsionit mbetet e përkushtuar për të zhvilluar mekanizma që forcojnë transparencën, integritetin institucional dhe besimin e qytetarëve, në përputhje me standardet e qeverisjes së mirë dhe interesin publik.
