Agjencia për Parandalimin e Korrupsionit e Kosovës (APK) ka lansuar programin e mentorimit për verifikimin e pasurisë të zyrtarëve publik me ekspert nga Këshilli i Evropës. Programi u lansua në prani të Ministres së Drejtësisë (Ministria e Drejtësisë) znj. Albulena Haxhiu, z. Fahret Vellija, anëtar i Këshillit Gjyqësor të Kosovës (Këshilli Gjyqësor i Kosovës), përfaqësuesve të Zyrës së Këshillit të Evropës (Council of Europe Office in Pristina) dhe nga Zyra e Bashkimit Evropian në Kosovë (European Union in Kosovo).
Programi i mentorimit do t’u ofrojë stafit të APK-së mundësinë për tu njoftuar me praktikat më të mira evropiane në verifikimin e aseteve të deklaruara nga zyrtarët shtetëror të Kosovës.
“Deklarimi dhe verifikimi i pasurisë është një mjet kyç në përpjekjet për parandalim të korrupsionit. Ky program do të ndihmojë stafin tonë të zhvillojë aftësitë dhe njohuritë që u nevojiten për të hetuar në mënyrë më efektive rastet e shkeljeve eventual dhe rrjedhimisht t’i shërbejmë më mirë popullit të Kosovës.” tha drejtori Yll Buleshkaj.
Programi i mentorimit realizohet me përkrahjen e Projektit kundër Krimit Ekonomik (PECK III) dhe është pjesë e një nisme bashkëpunimi të Bashkimit Evropian (BE) dhe Këshillit të Evropës të financuar nga Bashkimi Evropian dhe Këshilli i Evropës dhe i zbatuar nga ky i fundit.
