Në kuadër të shkëmbimit të përvojave ndërkombëtare për mbrojtjen e sinjalizuesve, delegacioni i Kosovës i kryesuar nga Drejtori i APK-së Yll Buleshkaj, qëndroi për vizitë studimore Irlandë ku është pritur nga udhëheqësit e institucioneve homologe të specializuara në mbrojtjen e sinjalizuesve dhe mekanizmave për parandalimin dhe luftimin e korrupsionit.
Vizita e delegacionit të Kosovës në Irlandë ka për qëllim thellimin e bashkëpunimit dhe shkëmbimin e përvojave praktike mbi procedurat e brendshme dhe funksionimin e kanaleve të raportimit të sinjalizuesve dhe gjithashtu shkëmbimin e njohurive mbi procedurat e brendshme dhe funksionimin e kanaleve të sigurta të raportimit të sinjalizuesve.
Delegacioni nga Kosova ka zhvilluar takime me përfaqësues të Ombudmanit të Policisë së Irlandës, përfaqësues të Universitetit Maynooth dhe Institutit Evropian i Mbrojtjes së Sinjalizuesve si dhe përfaqësues të institucioneve të drejtësisë për shkëmbimin e përvojave dhe njohurive në lidhje me veprimet në procedurat hetimore të raporteve të pranuara nga zyrtarët përgjegjës.
Gjatë vizitës në Irlandë, delegacioni nga Kosova zhvilloi takime edhe me përfaqësues të Transparency International në Irlandë ku u diskutua për kornizën ligjore dhe institucionale për mbrojtjen e sinjalizuesve dhe zbatimin e normave efektive në procesin e administrimit të rasteve të sinjalizimit dhe bashkëpunimin e inistitucioneve me sektorin jo-qeveritar.
Në vizitën studimore në Irlandë po marrin pjesë përfaqësues nga APK, Ministria e Drejtësisë, Policia e Kosovës, Gjykata Themelore, Oda Ekonomike, përfaqësues nga Sektori Privat dhe përfaqësues të Projektit PECK III.
Vizita studimore e përfaqësuesve të Kosovës në Irlandë u realizua në kuadër të Projektit kundër Krimit Ekonomik në Kosovë (PECK III), pjesë e nismës së përbashkët të bashkëpunimit të Bashkimit Evropian (BE) dhe Council of Europe Office in Pristina të financuar nga Bashkimi Evropian dhe Këshilli i Evropës.
