Prishtinë, 20 Gusht 2025

Agjencia për Parandalimin e Korrupsionit (APK) dhe Instituti i Kosovës për Administratë Publike (IKAP) sot nënshkruan një Memorandum Bashkëpunimi, me qëllim të zhvillimit të modulit të parë online mbi Parandalimin e Konfliktit të Interesit në Ushtrimin e Funksionit Publik.

Ky bashkëpunim ndërinstitucional synon të:

  • fuqizojë zyrtarët publikë me njohuri mbi konfliktin e interesit;
  • sigurojë qasje të gjerë dhe të barabartë në trajnimet online;
  • integrojë teknologjinë digjitale në procesin e edukimit dhe vetëdijesimit;
  • kontribuojë në krijimin e një administrate publike më të përgjegjshme dhe me standarde më të larta integriteti.

Si pjesë e këtij bashkëpunimi,  Agjencia për Parandalimin e Korrupsionit (APK) angazhohet të ofrojë përmbajtjen ligjore dhe profesionale, duke përfshirë rastet praktike dhe video shpjeguese. Instituti i Kosovës për Administratë Publike (IKAP) do të ofrojë platformën Moodle dhe ekspertizën metodologjike për strukturimin e materialeve trajnuese. Ndërsa, nga Qeveria Gjermane përmes Deutsche Gesellschaft für Internationale Zusammenarbeit (GIZ) GmbH do të sigurojë mbështetjen teknike për zhvillimin e modulit dhe materialeve didaktike.

Moduli online do të përfshij:

  • Njësi tematike dhe nën-tema mbi konfliktin e interesit;
  • Video shpjeguese dhe raste ilustrative;
  • Pyetësorë vetëvlerësues gjatë modulit;
  • Test final dhe certifikatë elektronike pas përfundimit me sukses;

Drejtori i APK-së, z. Yll Buleshkaj, theksoi se ky memorandum është një hap i rëndësishëm për fuqizimin e integritetit publik.

“Kjo iniciativë është në vazhdën e përdorimit të teknologjisë nga Agjencia për të zbatuar mandatin e saj ligjor, me fokus të veçantë në edukimin dhe vetëdijesimin e zyrtarëve publikë për parandalimin e konfliktit të interesit dhe forcimin e etikës në shërbimin publik”.

Po ashtu, me këtë rast, z. Buleshkaj uroi drejtorin e ri të IKAP-it, z. Hysen Muzliukaj, për marrjen e detyrës së tij së fundmi.

“Uroj kolegun tim, drejtorin e ri të IKAP-it, z. Hysen Muzliukaj, për marrjen e detyrës. Jam i bindur se përvoja dhe përkushtimi i tij do të jenë një vlerë e shtuar për bashkëpunimin tonë dhe për fuqizimin e shërbimit civil në Kosovë”.

Drejtori i Përgjithshëm i IKAP-it, z. Hysen Muzliukaj, vlerësoi bashkëpunimin me APK-në si një model të mirëfilltë të koordinimit ndërinstitucional.

“Ky modul online do të ndihmojë zyrtarët publikë që të marrin njohuri cilësore në mënyrë efikase dhe moderne, duke rritur profesionalizmin dhe integritetin në administratën publike”.

Agjencia për Parandalimin e Korrupsionit falënderon Qeverinë Gjermane e cila përmes GIZ Kosova mbështet këtë proces dhe e konsideron këtë si një investim afatgjatë në ndërtimin e kapaciteteve institucionale dhe forcimin e integritetit publik në Kosovë.

Ky memorandum shënon një hap konkret në modernizimin e qasjes së edukimit të shërbyesve publik dhe një shembull të mirë të bashkëpunimit ndërmjet institucioneve vendore dhe partnerëve ndërkombëtar.