Tiranë, 16 shtator 2025 – Një delegacion i Agjencisë për Parandalimin e Korrupsionit (APK)
të Kosovës, i kryesuar nga Drejtori Yll Buleshkaj, realizoi një takim institucional me Drejtorin
e Përgjithshëm të Drejtorisë Antikorrupsion të Shqipërisë, z. Insidor Rexhepi. Takimi u
fokusua në forcimin e bashkëpunimit rajonal në fushën e parandalimit dhe luftimit të
korrupsionit.
Gjatë bisedimeve, dy drejtorët theksuan rëndësinë e shkëmbimit të përvojave dhe
praktikave më të mira në zhvillimin e mekanizmave parandalues, rritjen e integritetit dhe
transparencës institucionale. Në qendër të diskutimeve ishte edhe forcimi i kapaciteteve
dhe ekspertizave teknike dypalëshe.
Drejtori Buleshkaj i uroi z. Rexhepi suksese në detyrën e tij, duke shprehur angazhimin e
APK-së për të vazhduar bashkëpunimin e ngushtë me institucionin homolog në Shqipëri. Ky
bashkëpunim synon vendosjen e standardeve më të larta të transparencës dhe
llogaridhënies.
Takimin e përshëndeti edhe znj. Silvana Ramadani, këshilltare e Ministres së Shtetit për
Administratën Publike dhe Antikorrupsionin, e cila nënvizoi rolin thelbësor të koordinimit
institucional dhe politik në konsolidimin e përpjekjeve antikorrupsion.
Ky takim shërben si një platformë e rëndësishme për thellimin e bashkëpunimit mes dy
institucioneve, duke forcuar përpjekjet e përbashkëta drejt një qeverisjeje më të mirë dhe
me më shumë integritet.
