Ferizaj, 23 tetor 2025
Agjencia për Parandalimin e Korrupsionit (APK) zhvilloi sot një ligjëratë-diskutim me nxënësit e Gjimnazit “Dr. Shaban Hashani”, në Ferizaj, në kuadër të aktiviteteve që synojnë edukimin e brezit të ri mbi vlerat e ndershmërisë, transparencës dhe përgjegjësisë qytetare për të ndërtuar një shoqëri pa korrupsion.
Në takim morën pjesë z. Liridon Nika, Drejtor i Departamentit për Administratë dhe Shërbime të Përgjithshme, z. Esad Ejupi, Drejtor i Departamentit për Parandalimin e Konfliktit të Interesit, dhe z. Agron Behrami, Udhëheqës i Divizionit për Kontrollin dhe Verifikimin e Pasurisë, të cilët bashkëbiseduan me nxënësit mbi temat që prekin çdo qytetar – rëndësinë e integritetit dhe rolin që ata mund të kenë në parandalimin e korrupsionit.
Nxënësit shfaqën interes dhe morën pjesë aktive me pyetje lidhur me mënyrat konkrete të parandalimit të korrupsionit.
Falënderojmë Drejtorinë për Arsim në Komunën e Ferizajt dhe Gjimnazin “Shaban Hashani” në Ferizaj, për bashkëpunimin dhe mikpritjen.
Agjencia do të vazhdojë me aktivitete të ngjashme në shkolla të tjera të vendit, për të forcuar edukimin qytetar dhe integritetin te të rinjtë.
#Integriteti #Transparenca #Rinia #ParandalimiIKorrupsionit #APK #Kosova
