Prishtinë, 12 dhjetor 2025 – Agjencia për Parandalimin e Korrupsionit (APK) mirëpret
publikimin e raportit të Institutit të Kosovës për Drejtësi (IKD) “Deklarimi i pasurisë – Gabimi
gjyqësor që hoqi gjithë përgjegjësinë e shkelësve të ligjit”, i cili ofron një analizë të detajuar
të ndikimit që një aktgjykim i Gjykatës Supreme ka pasur në trajtimin e rasteve të
mosdeklarimit apo deklarimit të rremë të pasurisë nga zyrtarët publikë.
APK vlerëson profesionalizmin e raportit dhe e konsideron atë si një dokument të
rëndësishëm analitik, i cili do të kontribuojë në qartësimin e standardeve gjyqësore dhe
rikthimin e praktikës së drejtë në këtë fushë jetike të integritetit publik.
Në prezantimin e raportit, hulumtuesi i lartë i IKD-së, Gzim Shala, theksoi se ndonëse
mosdeklarimi i pasurisë ka qenë i kriminalizuar që nga viti 2013, Gjykata Supreme ka krijuar
një standard të ri përmes një aktgjykimi që, sipas tij: “faktikisht e ka ndryshuar ligjin”. Ai
vlerësoi se ky vendim ka shkaktuar: “qasje të pabarabartë dhe kundërligjshme”, duke
ndikuar në trajtimin jo të njëjtë të rasteve të vjetra dhe të reja. Ai theksoi se vendimi i
Supremes është bazuar në një normë të shfuqizuar (nenin 17 të Ligjit të vitit 2011), duke e
kategorizuar këtë vepër si kundërvajtje dhe jo si vepër penale.
IKD argumentoi se bëhet fjalë për një gabim të rëndë, me pasoja të gjera negative në luftën
kundër korrupsionit, duke bërë thirrje që gjykatat të zbatojnë ligjin në fuqi në pajtim me
nenin 102.3 të Kushtetutës, deri në nxjerrjen e një qëndrimi të ri nga Gjykata Supreme.
Në tryezë morën pjesë përfaqësues të gjyqësorit, prokurorisë, avokatisë dhe institucioneve
shtetërore, të cilët dhanë perspektiva të ndryshme profesionale mbi këtë çështje.
Gjyqtari i Gjykatës Supreme, Burim Ademi, tha se një vendim i vetëm nuk mund të krijojë
praktikë gjyqësore:“Praktika gjyqësore nuk mund të ndërtohet mbi një vendim të vetëm…
Nuk duhet të referohet i gjithë sistemi prokurorial dhe gjyqësor mbi bazën e një rasti
konkret.” Ai shtoi se rekomandimet e raportit janë të drejta dhe se dispozitat e shfuqizuara
nuk mund të zbatohen në çështje penale.
Prokurori në Prokurorinë Themelore të Prishtinës, Arianit Salihu, vlerësoi se:“Tani kemi një
standard të ri se çfarë konsiderohet pasuri në kuptimin penal… Vendimi i prillit të vitit të
kaluar ka ndryshuar krejt qasjen.” Sipas tij, aktgjykimi ka efekt domino në praktikën
gjyqësore, ndërsa ai u shpreh se pajtohet me gjetjet e IKD-së.
Gjyqtari i Gjykatës Themelore, Gent Beka, theksoi kompleksitetin e rasteve:“Është vështirë
të ndahet vija administrative nga përgjegjësia penale… Shumë prej rasteve janë të
ndërlidhura me raportet e Agjencisë Kundër Korrupsionit.”
Drejtori i APK-së, Afrim Atashi, theksoi se aktgjykimi i Gjykatës Supreme ka prekur
drejtpërdrejt mandatin e Agjencisë: “Aktgjykimi i Supremes na ka kufizuar shumë. Edhe pse
kallëzimet tona penale hidhen, ne jemi të obliguar nga ligji të vazhdojmë t’i bëjmë ato.”

APK rikujton se deklarimi i pasurisë është një prej mekanizmave më të rëndësishëm në
parandalimin e korrupsionit dhe çdo paqartësi në interpretimin e tij krijon hapësirë për
shmangie të përgjegjësisë penale nga zyrtarët publikë. Agjencia beson fuqishëm se raporti i
IKD-së është kontribut i rëndësishëm profesional për sistemin e drejtësisë, dhe se gjetjet e
tij do të ndihmojnë në: unifikimin e praktikës gjyqësore,forcimin e integritetit publik, rritjen
e llogaridhënies së zyrtarëve, dhe rikthimin e besimit në sistemin e deklarimit të pasurisë.