Më 5 dhjetor 2024, Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, mbajti mbledhjen e rregullt të udhëhequr nga kryetari, z. Adnan Rrustemi. Gjatë kësaj mbledhjeje, Plani i Performancës për vitin 2025 i Agjencisë për Parandalimin e Korrupsionit (APK) u shqyrtua dhe u miratua njëzëri.

Drejtori i APK-së, z. Yll Buleshkaj, prezantoi planin, duke theksuar angazhimin e Agjencisë për të forcuar integritetin, transparencën dhe llogaridhënien përmes tri prioriteteve strategjike kryesore dhe gjashtë objektivave kyçe.

Tri prioritetet strategjike të Planit të Performancës për vitin 2025 janë si vijon:

  1. Parandalimi i korrupsionit përmes mekanizmave ligjorë dhe institucionalë:
    Z. Buleshkaj theksoi rëndësinë e zbatimit dhe monitorimit të ligjeve për parandalimin e konfliktit të interesit, deklarimin e pasurisë dhe mbrojtjen e sinjalizuesve. Ai nënvizoi se APK do të forcojë kapacitetet e monitorimit dhe raportimit, si dhe do të përmirësojë kornizën ligjore, duke siguruar përputhshmëri me praktikat më të mira ndërkombëtare.
  2. Digjitalizimi dhe modernizimi i proceseve:
    Teknologjia u cilësua si shtyllë kryesore e reformave të Agjencisë. Përmirësimi i platformave ekzistuese, përfshirë sistemin elektronik për deklarimin e pasurisë dhe atë të raportimit të keqpërdorimeve, do të jetë prioritet për rritjen e efikasitetit, sigurisë dhe qasjes për të gjitha palët e interesit.
  3. Rritja e vetëdijes publike dhe bashkëpunimi ndërinstitucional:
    Përmes fushatave vetëdijësuese, trajnimeve dhe aktiviteteve bashkëpunuese me institucione partnere, APK do të angazhohet për të edukuar qytetarët dhe zyrtarët publikë mbi rëndësinë e parandalimit të korrupsionit dhe etikës në punë. Një fokus i veçantë do të jetë nxitja e një kulture të integritetit në sektorin publik dhe privat.

Pas diskutimeve dhe vlerësimeve në Komision, Plani i Performancës për vitin 2025 u miratua njëzëri, duke reflektuar përkushtimin e Kuvendit dhe APK-së për avancimin e përpjekjeve në luftën kundër korrupsionit dhe ndërtimin e një shteti të bazuar në sundimin e ligjit.

Agjencia për Parandalimin e Korrupsionit mbetet e përkushtuar ndaj objektivave të saj dhe do të vazhdojë të përmbushë misionin e saj për një shoqëri me integritet, transparencë dhe llogaridhënie.