Prishtinë, 15 shtator 2025 – Një delegacion i Agjencisë së Kosovës për Parandalimin e
Korrupsionit (APK), i udhëhequr nga Drejtori Yll Buleshkaj, ka realizuar një vizitë pune në
Autoritetin Kombëtar Antikorrupsion të Italisë (ANAC) në Romë. Kjo vizitë shënon një hap të
rëndësishëm në thellimin e bashkëpunimit strategjik mes dy institucioneve dhe në
shkëmbimin e praktikave më të mira në fushën e parandalimit të korrupsionit.
Delegacioni i APK-së u prit nga Presidenti i ANAC, Dr. Giuseppe Busia, së bashku me Dr.
Giuseppe Abbatino dhe znj. Lorenza Ponzone, përgjegjëse për Marrëdhëniet
Ndërkombëtare.
Gjatë takimit, u diskutuan një sërë temash me interes të përbashkët, përfshirë:
Përdorimi i vlerësimit të rrezikut dhe analizës së të dhënave për të identifikuar dhe
parandaluar aktet korruptive.
Mekanizmat për rritjen e transparencës dhe integritetit në prokurimin publik.
Forcimi i kapaciteteve institucionale dhe bashkëpunimi ndëragjencional.
Zhvillimi i një partneriteti strategjik për aktivitete të përbashkëta në të ardhmen, si
asistenca teknike, shkëmbimi i ekspertëve, dhe iniciativat e mundshme të financuara
nga donatorët.
Presidenti Busia, duke vlerësuar punën e APK-së, shprehu gatishmërinë e ANAC për të nisur
punën drejt nënshkrimit të një Memorandumi Mirëkuptimi, i cili do të listojë fushat
specifike të bashkëpunimit. Deri në finalizimin e këtij Memorandumi, ANAC do të vazhdojë
të mbështesë APK-në për të përfituar nga rrjetet ekzistuese antikorrupsion.
APK shpreh mirënjohjen e saj për Misionin e OSBE-së në Kosovë (OSCE Mission in Kosovo)
për mbështetjen e vazhdueshme dhe për mundësimin e kësaj vizite të rëndësishme.
