Podujevë, 12 shtator 2025
Në kuadër të aktiviteteve edukative me të rinjtë, Agjencia për Parandalimin e Korrupsionit (APK) zhvilloi sot një bashkëbisedim me maturantët e Gjimnazit “Aleksandër Xhuvani”, në Podujevë.
Ky aktivitet është pjesë e një serie takimesh që APK po zhvillon në shkolla dhe komuna të ndryshme të Republikës së Kosovës, me qëllim forcimin e edukimit qytetar dhe ngritjen e vetëdijes për ndërtimin e një shoqërie më të drejtë, më të ndershme dhe pa korrupsion.
“Të rinjtë janë forca që garanton një të ardhme më të drejtë dhe institucione më të forta”, u theksua mes tjerash gjatë takimit të sotëm.
Në hapje të ligjëratës-diskutimit, z. Liridon Nika, Drejtor i Departamentit për Administratë dhe Shërbime të Përgjithshme dhe zëvendësdrejtor i APK-së, foli për rëndësinë e edukimit të brezit të ri mbi vlerat e integritetit, transparencës dhe ndershmërisë në jetën publike dhe personale.
Ai theksoi se parandalimi i korrupsionit nuk nis vetëm nga institucionet, por edhe nga vetëdijesimi i qytetarëve, veçanërisht të rinjve.
Nxënësit shfaqën interes për temat e trajtuara, duke ngritur pyetje rreth transparencës, integritetit dhe mënyrave konkrete se si ata vetë mund të raportojnë raste dhe të kontribuojnë në parandalimin e korrupsionit.
Në vijim, z. Esad Ejupi, Drejtor i Departamentit për Parandalimin e Konfliktit të Interesit, prezantoi para nxënësve konceptin e konfliktit të interesit, sfidat që sjell kjo dukuri në administratën publike dhe rëndësinë e shmangies së saj për ndërtimin e një sistemi të drejtë dhe transparent.
Kurse, z. Valon Krasniqi, Zyrtar i Lartë për Kontrollin e Pasurisë dhe Dhuratave, i njoftoi nxënësit me procesin e deklarimit dhe verifikimit të pasurisë së zyrtarëve publikë, duke theksuar rolin kyç që ka ky mekanizëm në rritjen e llogaridhënies.
Agjencia shpreh mirënjohje për Drejtorinë Komunale të Arsimit në Podujevë për bashkëpunimin, si dhe për stafin dhe nxënësit e shkollës “Aleksandër Xhuvani”, për mikpritjen dhe angazhimin aktiv gjatë diskutimit.
APK mbetet e përkushtuar të vazhdojë me aktivitete të tilla në shkolla dhe komuna të ndryshme të vendit, duke forcuar edukimin qytetar dhe duke ndërtuar themelet e një shoqërie më të drejtë, më transparente dhe pa korrupsion.
