Prishtinë, 3 Dhjetor 2025
Agjencia për Parandalimin e Korrupsionit (APK) dhe Departamenti i Gazetarisë i Fakultetit të Filologjisë – Universiteti i Prishtinës, kanë nënshkruar sot një Memorandum Bashkëpunimi, i cili shënon fillimin e një partneriteti të qëndrueshëm në fushën e integritetit publik, komunikimit profesional dhe edukimit mediatik.
Në ceremoninë e nënshkrimit, Drejtori i APK-së, z. Yll Buleshkaj, theksoi se ky bashkëpunim është një hap i rëndësishëm për forcimin e kulturës së integritetit në Kosovë dhe për afrim më të madh mes institucioneve publike dhe komunitetit akademik:
“Ky memorandum është vetëm fillimi i një bashkëpunimi që synon të krijojë vlerë të drejtpërdrejtë për publikun. Ne duam që qytetarët të përfitojnë nga një komunikim më i qartë, më i saktë dhe më profesional, ndërsa studentët e gazetarisë të fitojnë përvojë praktike, dije dhe aftësi që i përgatisin për tregun e punës dhe rolin e tyre në shoqëri. Ky bashkëpunim e forcon edhe më tej misionin tonë të përbashkët për një sektor publik më transparent, më të përgjegjshëm dhe më me integritet”, u shpreh z. Buleshkaj.
Edhe dekani i Fakultetit të Filologjisë, z. Abdullah Rexhepi, dhe sekretarja e Departamentit të Gazetarisë, znj. Blerta Dibrani, e vlerësuan këtë memorandum si një mundësi të rëndësishme për zhvillimin profesional të studentëve dhe forcimin e partneriteteve mes institucioneve publike.
Memorandumi parasheh një sërë aktivitetesh të përbashkëta që synojnë forcimin e komunikimit publik dhe zhvillimin profesional të studentëve, duke përfshirë prodhimin e materialeve mediale (podcast, videocast, video informuese dhe analiza komunikimi), organizimin e trajnimeve dhe ligjëratave profesionale për studentë dhe staf akademik në fushën e integritetit publik dhe parandalimit të korrupsionit, si dhe angazhimin praktik të studentëve të gazetarisë në projektet e APK-së për t’u mundësuar përvojë reale institucionale. Bashkëpunimi përfshin gjithashtu edhe këmbimin e ekspertizës mes dy institucioneve në fushën e komunikimit, gazetarisë dhe politikave të integritetit.
Ky partneritet i lidhur për një periudhë trevjeçare, synon të ndërthurë përvojën profesionale të APK-së me energjinë, kreativitetin dhe qasjen bashkëkohore të studentëve të gazetarisë, me qëllim krijimin e formave të reja të komunikimit publik dhe edukimit kundër korrupsionit, si dhe angazhimin praktik të studentëve të gazetarisë në projektet e APK-së për t’u mundësuar përvojë reale institucionale.
Agjencia për Parandalimin e Korrupsionit mbetet e përkushtuar që, përmes partneriteteve të tilla, të avancojë misionin e saj në shërbim të interesit publik dhe forcimit të besimit të qytetarëve në institucionet publike.
