Agjencia për Parandalimin e Korrupsionit zhvillon ligjëratë-diskutim me studentët e Fakultetit Juridik të
Universitetit të Prishtinës
Prishtinë, 15 maj 2025
Agjencia për Parandalimin e Korrupsionit (APK) organizoi një ligjëratë-diskutim të hapur me studentët e
Fakultetit Juridik të Universitetit të Prishtinës, me qëllim të prezantimit të mandatit, rolit dhe
aktiviteteve të saj në luftën kundër korrupsionit. Zyrtarët e lartë të APK-së ofruan përgjigje të detajuara
për pyetjet dhe shqetësimet e studentëve, duke kontribuar në rritjen e ndërgjegjësimit dhe edukimit
qytetar për çështjet e integritetit dhe transparencës.
Ky aktivitet u zhvillua në kuadër të përpjekjeve të vazhdueshme të Agjencisë për forcimin e
transparencës institucionale, promovimin e edukimit qytetar dhe inkurajimin e gjeneratave të reja që të
jenë mbrojtës të vlerave publike në Republikën e Kosovës.
Në hapje të ligjëratës, z. Liridon Nika, Drejtor i Departamentit për Administratë dhe Shërbime të
Përgjithshme dhe zëvendësdrejtor i APK-së, prezantoi në mënyrë të detajuar mandatin dhe veprimtaritë
kryesore të Agjencisë, duke theksuar rolin e saj kyç në parandalimin e korrupsionit dhe promovimin e
transparencës në institucionet publike.
Më pas, z. Afrim Atashi, Drejtor i Departamentit për Kontrollin e Pasurisë dhe Dhuratave, prezantoi
mekanizmat e kontrollit të pasurisë dhe dhuratave të zyrtarëve publikë, duke u ndalur tek legjislacioni
dhe masat që ndërmerr APK për të siguruar transparencë dhe llogaridhënie.
Në vijim, z. Esad Ejupi, Drejtor i Departamentit për Parandalimin e Konfliktit të Interesit, prezantoi
konceptin e konfliktit të interesit dhe shpjegoi mënyrat se si Agjencia identifikon dhe parandalon rastet
e tilla. Ai theksoi rëndësinë e zbatimit të vendimeve të APK-së nga institucionet publike.
Z. Atashi dhe z. Ejupi iu përgjigjen shumë pyetjeve të studentëve lidhur me procedurat praktike të
kontrollit të pasurisë dhe dhuratave si dhe rasteve konkrete të konfliktit të interesit.
Përpara ligjëratës, zyrtarët e APK-së zhvilluan një takim me Dekanin e Fakultetit Juridik, z. Avni Puka, dhe
Prodekanin, z. Ardrit Gashi, ku u diskutua thellimi i bashkëpunimit ndërinstitucional dhe mundësitë për
projekte të përbashkëta në promovimin e ligjshmërisë dhe integritetit.
Ky aktivitet iu dha studentëve një mundësi të veçantë për të zgjeruar njohuritë e tyre mbi rolin dhe
funksionet e Agjencisë për Parandalimin e Korrupsionit, si dhe për të mësuar më shumë rreth praktikave
më të mira të transparencës dhe llogaridhënies në administratën publike.
Agjencia për Parandalimin e Korrupsionit falënderon Fakultetin Juridik për mikpritjen dhe
bashkëpunimin, dhe riafirmon përkushtimin për të vazhduar me aktivitete të ngjashme me studentë dhe
profesionistë të rinj, në funksion të ndërtimit të një shoqërie më të drejtë, transparente dhe me
integritet të lartë.