Prishtinë, 12 dhjetor 2025
Dita e pestë e Javës së Integritetit 2025, e organizuar Agjencia për Parandalimin e Korrupsionit (APK) në bashkëpunim me Forumin Konsultativ të APK-së me Shoqërinë Civile, u fokusua në një nga mekanizmat kryesorë për forcimin e transparencës dhe mbrojtjen e interesit publik: sinjalizimin në sektorin publik dhe privat.
Në hapje të sesionit tematik, Drejtori i APK-së, z. Yll Buleshkaj, theksoi se sinjalizuesit janë një hallkë e domosdoshme për ruajtjen e integritetit institucional.
“Integriteti i zyrtarëve publik nuk është opsion – është përgjegjësi e përbashkët, dhe sinjalizuesit janë aleatët tanë më të fortë në këtë rrugëtim. Sinjalizimi, në sektorin publik apo privat, është një mekanizëm thelbësor për mbrojtjen e interesit publik dhe për afrim drejt standardeve evropiane”, u shpreh ai.
Drejtori Buleshkaj theksoi se sinjalizimi në Kosovës, si në sektorin privat e atë publik është mjaft i rëndësishëm nëse dëshirojmë që si shtet më shpejt të shkojmë drejt procesit të integrimit.
Në vijim, Udhëheqësi i Divizionit për Sinjalizim në APK, z. Milot Shala, prezantoi të dhëna mbi funksionimin e mekanizmit të sinjalizimit, duke theksuar rritjen e rasteve të raportuara gjatë vitit 2025.
“Sivjet kemi dyfishuar rastet e sinjalizimit krahasuar me vitin e kaluar, çka tregon se mekanizmi po shfrytëzohet më shumë dhe institucionet po ndërtojnë kapacitete më të qëndrueshme. Mbi 200 institucione publike tashmë kanë krijuar kanalet e brendshme të sinjalizimit”, deklaroi Shala.
Ai shtoi se do të punohet që ky mekanizëm të bëhet funksional, i besueshëm dhe i qasshëm për të gjithë, duke garantuar që zëri i sinjalizuesve të dëgjohet dhe veprimi mbi shqetësimet të jetë efektiv.
Për sfidat në sektorin privat foli z. Rizah Plakolli nga Inspektorati Qendror i Punës, i cili theksoi se ende ka nevojë për rritjen e kapaciteteve dhe zbatimin më të plotë të detyrimeve ligjore për krijimin e kanaleve të brendshme të sinjalizimit.
“Punëdhënësit shpesh hezitojnë ose improvizojnë në caktimin e zyrtarëve kompetentë, pavarësisht se detyrimi ligjor është i qartë. Ne mbetemi të përkushtuar të sigurojmë mbrojtje efektive për sinjalizuesit dhe respektim të standardeve ligjore”, tha Plakolli.
Nga komuniteti i biznesit, Kryetari i Odës Ekonomike të Kosovës, z. Lulzim Rafuna, nënvizoi se për sektorin privat puna e sinjalizuesit është diçka e re, që duhet mirëkuptuar duke pasur parasysh se jemi një shtet në zhvillim dhe bizneset janë në proces përshtatjeje.
“Oda Ekonomike, si institucioni më i vjetër që këtë vit shënon 64-vjetorin e themelimit, gjithmonë ka qenë në krah të bizneseve për t’i mbështetur në plotësimin e standardeve dhe krijimin e një konkurrence të drejtë. Kjo nuk do të ishte e mundur pa punën e sinjalizuesve, qoftë në sektorin publik apo privat. Një institucion publik me integritet është baza e një konkurrence të drejtë dhe baza e motivimit për ardhjen e investitorëve të huaj në vendin tonë”, tha ai.
Kontribut i rëndësishëm u dha edhe nga Lëvizja FOL, përmes znj. Burbuqe Kastrati, e cila theksoi rëndësinë e ngritjes së kapaciteteve të bizneseve dhe nevojën për bashkëpunim të vazhdueshëm me institucionet publike për forcimin e sinjalizimit si mekanizëm kundër korrupsionit.
“FOL ndërvite është angazhuar përmes avokimit e monitorimit në përcaktimin e politikave institucionale në zbatimin efektiv të LSM. FOL vlerëson se sinjalizimi mbetet mekanizëm shumë i rëndësishëm në luftimin e korrupsionit në sektorin publik dhe privat”.
Sesioni u moderua nga zyrtarja e APK-së, znj. Bleona Krasniqi, e cila theksoi se sinjalizimi është një akt në shërbim të së vërtetës dhe përgjegjësisë, duke u bërë thirrje institucioneve që të sigurojnë kanale funksionale dhe mbrojtje efektive për sinjalizuesit.
Pjesëmarrësit trajtuan një sërë çështjesh praktike, përfshirë funksionalitetin e kanaleve të sinjalizimit, sfidat e sektorit privat, çështjet e mbrojtjes së sinjalizuesve dhe nevojën për bashkëpunim të qëndrueshëm ndërinstitucional.
Aktivitetet e Javës së Integritetit 2025 u përmbyllën sot me trajtimin e një prej temave më të ndjeshme dhe njëkohësisht më të rëndësishme për forcimin e transparencës dhe sundimit të ligjit në vend: sinjalizimin në sektorin publik dhe privat.
