Prishtinë, 29 shtator 2025 –
Drejtori i Agjencisë për Parandalimin e Korrupsionit (APK), z. Yll Buleshkaj, priti sot në takim Shefin e Misionit të OSBE-së në Kosovë, Ambasadorin Gerard McGurk. Në delegacionin e OSBE-së ishin edhe z. Bertram Welsing, Drejtor i Departamentit për Siguri Publike (DSPS), dhe z. Valdet Hajdini, Oficer Ligjor Kombëtar, Seksioni i Qeverisjes.
Fokusi i diskutimit ishte thellimi i bashkëpunimit aktual dhe identifikimi i mundësive konkrete për forcimin e mekanizmave institucionalë të Kosovës në aspektet e transparencës, integritetit, sundimit të ligjit, zhvillimit të planeve të integritetit dhe harmonizimit të kuadrit ligjor me standardet evropiane.
Drejtori Buleshkaj prezantoi mandatin dhe funksionet kyçe të APK-së, duke theksuar progresin dhe sfidat në punën jetike të kontrollit të pasurisë, parandalimit të konfliktit të interesit, monitorimit të planeve të integritetit dhe mbrojtjes së sinjalizuesve.
Ai shfrytëzoi rastin për të falënderuar Ambasadorin McGurk për mbështetjen e vazhdueshme dhe thelbësore të OSBE-së, duke theksuar se bashkëpunimi i OSBE-së në fushën e zhvillimit të planeve të integritetit, harmonizimit ligjor dhe asistencës në mbrojtjen e sinjalizuesve ka qenë i rëndësisë se veçantë për Agjencinë.
Ambasadori McGurk rikonfirmoi përkushtimin e plotë të Misionit për të fuqizuar më tej bashkëpunimin me APK-në dhe për të kontribuar në forcimin e besimit të qytetarëve në institucionet e Kosovës.
