Strasburg, Francë – Reformat institucionale të Kosovës në fushën e parandalimit të
korrupsionit janë vlerësuar ndërkombëtarisht gjatë një punëtorie të nivelit të lartë të
organizuar nga Këshilli i Evropës në Strasburg, ku Agjencia për Parandalimin e Korrupsionit
(APK) prezantoi qasjen dhe përvojën e saj në hartëzimin e rreziqeve të korrupsionit.
Në punëtorinë ndërkombëtare me temën “Hartëzimi i rreziqeve të korrupsionit: Mësime të
nxjerra dhe mundësi aplikimi”, përfaqësues nga vendet e Ballkanit Perëndimor, Evropa dhe
Afrika e Veriut u mblodhën për të diskutuar strategjitë më efektive në identifikimin dhe
menaxhimin e rreziqeve të korrupsionit.
Në emër të Republikës së Kosovës, Drejtori i APK-së, z. Yll Buleshkaj, ndau përvojën e
Agjencisë në realizimin e një procesi gjithëpërfshirës të vlerësimit të rreziqeve të
korrupsionit, që përfshiu 159 institucione publike, përfshirë 115 institucione shtetërore dhe
44 ndërmarrje publike.
“Korrupsioni nuk është vetëm çështje ligjore – është sfidë e kulturës institucionale.
Ndryshimi fillon me diagnostikim të saktë dhe vullnet për të vepruar aty ku rreziku është
real,” deklaroi z. Buleshkaj gjatë fjalës së tij para përfaqësuesve në këtë punëtori.
Ai theksoi rëndësinë e vullnetit politik në të gjitha nivelet, formalizimit të përgjegjësive,
përfshirjes së hershme të institucioneve të targetuara dhe ruajtjes së komunikimit të
vazhdueshëm gjatë procesit të vlerësimit. Buleshkaj gjithashtu ngriti shqetësime për sfidat
aktuale si mungesa e një baze të dhënash të konsoliduar që i bëjnë vlerësimet kundër
korrupsionit më të vështira.
Për më tepër, Buleshkaj theksoi rëndësinë që teknologjia – përmes analizës së të dhënave,
inteligjencës artificiale dhe mjeteve digjitale – në të ardhmen të vihet në shërbim të
detektimit dhe parandalimit të korrupsionit në mënyrë më efektive.
Detajet e përvojës, sfidave dhe mundësive që kanë shoqëruar zbatimin e procesin e
hartëzimit të korrupsionit janë prezantuar nga z. Blerim Kelmendi, Drejtor i Departamentit,
ndërsa në ngjarje morën pjesë edhe të gjithë anëtarët e Agjencisë që kanë zbatuar në
Kosovë ketë proces, duke përfaqësuar një qasje kolektive dhe teknike të mirëkoordinuar.
Pjesëmarrja e Kosovës në këtë format jo vetëm që e rikonfirmon angazhimin e saj për
reforma të thella në fushën e integritetit dhe sundimit të ligjit, por gjithashtu e paraqet
vendin si një shembull pozitiv në nivel Evropian dhe më gjerë.
Pjesëmarrja e Agjencisë për Parandalimin e Korrupsionit e Kosovës në ketë punëtori u
mundësua nga Projekti i Këshillit tëi Evropës kundër krimit ekonomik në Kosovë (PECK III), një
projekt i bashkëfinancuar nga BE dhe Këshilli i Evropës.