Agjencia për Parandalimin e Korrupsionit e udhëhequr nga Drejtori i Agjencisë, Yll Buleshkaj po merr pjesë në punëtorinë një ditore e organizuar me qëllim të identifikimit të boshllëqeve ekzistuese në zhvillimin e strategjive kundër korrupsionit, me fokus në bashkëpunimin rajonal si dhe rolin e institucioneve që mbikëqyrin zbatimin e tyre.
Punëtoria, po ashtu, synon të shkëmbehen përvojat dhe ekspertizën kolektive Institucioneve dhe të Organizatave të Shoqërisë Civile (OSHC) nga rajoni i Ballkanit Perëndimor, duke përfshirë Kosovën, Maqedoninë e Veriut, Shqipërinë, Serbinë, Malin e Zi dhe Bosnje-Hercegovinën .
Në fjalën hyrëse drejtori i Agjencisë, Yll Buleshkaj theksoj që ‘parandalimi dhe luftimi i korrupsionit kërkon angazhim të vazhdueshëm dhe bashkëpunim të gjerë midis qeverisjes, sektorit privat, shoqërisë civile dhe komunitetit ndërkombëtar’.
Znj. Jelena Perović, drejtoreshë e Agjencisë për Parandalimin e Korrupsionit në Malin e Zi, theksoj imperativin që agjencitë për të kryer funksionin e vet të papenguar të jenë të pavarura financiarisht dhe profesionalisht. Në Malin e Zi kjo është siguruar duke garantuar një përqindje të caktuar nga buxheti i shtetit e cila nuk mund të zvogëlohet, dhe duke larguar nevojën që raportet e punës të Agjencisë të aprovohen nga parlamenti, por raportet dërgohen vetëm me qëllim njoftimi.
Z. Vedat Sogojeva, drejtor i zyrës për planifikim strategjik, në kuadër të Zyrës së Kryeministrit, vlerësoj jo vetëm nevojën për shkëmbim të përvojave por edhe kohën ideale në të cilën organizohet tryeza, e cila korrespondon me procesin e hartimit te Strategjisë Kombëtare Kundër Korrupsion të Kosovës.
Kjo tryezë është organizuar nga Lëvizja FOL në kuadër të projektit “Lufta efektive kundër korrupsionit” (ECAC) i përkrahur nga IFES.
