Sot, Agjencia për Parandalimin e Korrupsionit filloi procesin e vlerësimit së sektorëve me rrezik të lartë korrupsioni në përputhje me Metodologjinë e Këshillit të Evropës. Si rezultat i këtij aktiviteti pritet të identifikohen sektorët me potencial të lartë të korrupsionit, në mënyrë që institucionet të fokusojnë masat adekuate parandaluese dhe të luftimit të këtij fenomeni të dëmshëm.
Dy ekspertët e Këshillit të Evropës, z. Valts Kalnins dhe znj. Nieves Zuniga, të cilët janë edhe hartuesit kryesor të metodologjisë për hartëzimin sektorial të korrupsionit, së bashku me Grupin Punues të Agjencisë, për dy ditë me radhë, do të prezantohet, shqyrtohet dhe do të propozohet ndryshi me qëllim adaptimin e kësaj metodologjie në kontekstin Kosovar.
Z. Yll Buleshkaj, Drejtor i Agjencisë, në hapje të kësaj punëtorie theksoi rëndësinë e madhe që ka ky aktivitet jo vetëm për institucionin që zbaton vlerësimin por për shoqërinë kosovare në përgjithësi. Hartëzimi i rrezikut të korrupsionit do t’i lejojë që të identifikohen dhe vlerësojë sektorët, aktivitetet dhe funksionet me rrezik më të lartë korrupsioni, gjë që është thelbësore për hartimin e masave, shpërndarjen më të mirë të burimeve kundër korrupsionit.
Z. Edmon Dunga, i kyçur online nga Këshilli i Evropës përshëndeti vendimin e Agjencisë për Parandalimin e Korrupsionit për ta zbatuar këtë metodologji në vlerësimin sektorial të riskut dhe premtoj vazhdimin e përkrahjes të këtij procesi.
Ky aktivitet organizohet me përkrahjen e “Projektit kundër Krimit Ekonomik” (PECK III), financuar bashkërisht nga Bashkimi Evropian dhe Këshilli i Evropës dhe zbatuar nga ky i fundit. (Photo Credit CoE)
