Nga data 25 deri më 27 qershor 2024, në Tiranë, Shqipëri, u mbajt tryeza rajonale Gjurmimi i shpejt i Zbatimit të Konventës së Kombeve të Bashkuara Kundër Korrupsionit-Platforma Rajonale për Ballkanin Perëndimor’’ (Ang.”Fast Tracking the Implementation of the United Nations Convention Against Corruption – Regional Platform for the Western Balkans”). Kjo ngjarje e rëndësishme, organizuar nga Zyra e Kombeve të Bashkuara kundër Krimit dhe Drogave-UNODC, mblodhi përfaqësues të lartë qeveritarë dhe ekspertë nga rajoni i Ballkanit Perëndimor për të diskutuar dhe koordinuar përpjekjet e tyre në luftën kundër korrupsionit.

Agjencia për Parandalimin e Korrupsionit e Kosovës, e përfaqësuar nga Drejtori Yll Buleshkaj dhe Drejtori i Departamentit Afrim Atashi, mori pjesë aktive në këtë tryezë. Agjencia shfaqi përkushtimin dhe përpjekjet e saj për të forcuar integritetin dhe transparencën në sektorin publik dhe për të promovuar një qasje të përbashkët rajonale në zbatimin e Konventës së Kombeve të Bashkuara Kundër Korrupsionit (UNCAC).

Tryeza rajonale synoi përshpejtimin e zbatimit të UNCAC në rajonin e Ballkanit Perëndimor përmes një platforme të përbashkët rajonale. Diskutimet u përqendruan në përmirësimin e masave parandaluese dhe forcimin e kapaciteteve të zbatimit të ligjit, bashkëpunimit ndërkombëtar dhe rikuperimit të aseteve. Ndër temat kryesore që do të përfshihen në programin e ri rajonal janë:

  • Forcimi i kuadrit të integritetit për shërbyesit publikë në fushat vulnerabil,
  • Sigurimi i zbatimit të dokumenteve strategjike kombëtare anti-korrupsion,
  • Forcimi i strategjive rajonale për ndërgjegjësimin publik duke përfshirë sektorin privat, akademinë dhe OJQ-të,
  • Përmirësimi i integritetit dhe transparencës së sektorit privat, përfshirë lobimin dhe financimin e partive politike,
  • Forcimi i prokurimit publike dhe organeve të rishikimit të prokurimeve për të siguruar transparencë dhe konkurrencë, në përputhje me direktivat e BE-së,
  • Forcimi i transparencës së pronësisë përfituese në përputhje me standardet e BE-së deri në fund të vitit 2026,
  • Përmirësimi i interoperabilitetit të sistemeve publike të të dhënave.

Agjencia për Parandalimin e Korrupsionit mbetet e përkushtuar në përmbushjen e detyrimeve të saj sipas UNCAC dhe në promovimin e integritetit dhe transparencës në të gjitha nivelet e qeverisjes dhe shoqërisë. Pjesëmarrja në këtë tryezë rajonale konfirmon përkushtimin tonë për të punuar së bashku me partnerët rajonalë për të parandaluar dhe luftuar korrupsionin dhe për të ndërtuar institucione të forta dhe të ndershme.