Më 18 dhe 19 nëntor 2024, Drejtori i Agjencisë për Parandalimin e Korrupsionit të Kosovës, Yll Buleshkaj, mori pjesë në Konferencën Rajonale “Praktikat më të mira në Parandalimin e Korrupsionit – nga Politika në Veprim”, e organizuar nga UNODC dhe UNDP, e cila u mbajt në Hotel Garden në Prishtinë. Konferenca mblodhi së bashku përfaqësues të lartë të institucioneve shtetërore, organizatave ndërkombëtare, shoqërisë civile dhe mediave për të diskutuar sfidat dhe përvojat në luftën kundër korrupsionit në rajon.
Gjatë fjalimit të tij, z. Buleshkaj theksoi rëndësinë e krijimit të institucioneve të forta dhe të pavarura, të afta për të përballuar sfidat që sjell korrupsioni. “Forcimi i institucioneve dhe krijimi i një kulture të besimit janë kyçe për të parandaluar korrupsionin dhe për të siguruar transparencë të qëndrueshme. Lufta kundër korrupsionit kërkon jo vetëm politika të mira, por edhe veprime konkrete dhe të koordinuara,” tha ai.
Në sesionin e parë të konferencës, z. Buleshkaj ndau përvojat e Kosovës në hartimin dhe zbatimin e strategjive kundër korrupsionit, duke përmendur progresin në krijimin e një kornize ligjore dhe institucionale efektive. Ai gjithashtu adresoi sfidat me të cilat përballet Kosova, duke përfshirë nevojën për të forcuar bashkëpunimin ndërinstitucional dhe për të inkurajuar qytetarët të raportojnë rastet e korrupsionit.
Konferenca shërbeu si një platformë e rëndësishme për të ndarë praktikat më të mira rajonale dhe për të promovuar bashkëpunimin në luftën kundër korrupsionit. Përfaqësuesit e pjesëmarrës ndanë përvojat e tyre, duke theksuar rëndësinë e qasjes së përbashkët dhe të përqendruar në forcimin e integritetit, transparencës dhe sundimit të ligjit.
